Kina ka ekzekutuar 11 anëtarë të një familjeje famëkeqe mafioze që drejtonte qendra mashtrimi në Myanmar përgjatë kufirit të saj verilindor, raportojnë mediat shtetërore.
Anëtarët e familjes Ming u dënuan në shtator për krime të ndryshme, duke përfshirë vrasje, ndalim të paligjshëm, mashtrim dhe drejtim kazinosh nga një gjykatë në provincën Zhejiang të Kinës.
Familja Ming ishte një nga shumë klanet që drejtonin qytetin e Laukkaing, duke e transformuar një qytet të varfër në një qendër tërheqëse kazinosh dhe lagjesh me drita të kuqe.
Perandoria e tyre mashtruese u shemb në vitin 2023, kur ata u arrestuan dhe iu dorëzuan Kinës nga milicitë etnike që kishin marrë kontrollin e Laukkaing gjatë një përshkallëzimi në konfliktin e tyre me ushtrinë e Myanmarit.
Me këto ekzekutime, Pekini po u dërgon një mesazh mashtruesve të mundshëm. Por biznesi tani është zhvendosur në kufirin e Myanmarit me Tajlandën, si dhe në Kamboxhia dhe Laos, ku Kina ka shumë më pak ndikim.
Qindra mijëra njerëz janë trafikuar për të kryer mashtrime online në Mianmar dhe zona të tjera në Azinë Juglindore, sipas vlerësimeve të OKB-së. Midis tyre janë mijëra kinezë, dhe viktimat e tyre, nga të cilët ata u përvetësojnë miliarda dollarë, janë kryesisht kinezë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
