Konflikti mes Izraelit dhe Iranit po përshkallëzohet, pasi ushtria izraelite njoftoi se ka nisur një valë të re sulmesh ndaj infrastrukturës iraniane.
Sipas burimeve izraelite, në shënjestër janë vendosur depot e magazinimit të naftës, ndërsa janë goditur edhe disa avionë luftarakë F-14 të Iranit.
Raportimet nga Teherani tregojnë për shpërthime dhe shtëllunga tymi në disa zona pas sulmeve ndaj objekteve të karburantit. Ndërkohë, tensionet janë përhapur edhe në vendet e Gjirit Persik, ku janë raportuar sulme me dronë dhe raketa.
Në Kuvajt është goditur një ndërtesë qeveritare dhe depo karburanti në aeroportin ndërkombëtar, ndërsa Emiratet e Bashkuara Arabe njoftuan se mbrojtja ajrore po përballet me kërcënime raketore.
Pavarësisht situatës së tensionuar, aeroporti kryesor i Izraelit, Ben Gurion, ka rifilluar fluturimet, me rreth 2 mijë udhëtarë që pritet të nisen me 40 fluturimet e para që nga fillimi i konfliktit.
Në planin diplomatik, presidenti amerikan Donald Trump hodhi poshtë kërcënimet e zyrtarëve iranianë, ndërsa liderë ndërkombëtarë, përfshirë emirin e Katarit dhe ministrin e jashtëm të Kinës, kanë bërë thirrje për armëpushim dhe për shmangien e një përshkallëzimi të mëtejshëm të luftës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
