Qytetarët e Koresë së Veriut që kapen duke parë seriale apo filma të Koresë së Jugut mund të përballen me dënime të rënda, përfshirë vite të tëra punë të detyruar, poshtërime publike dhe madje edhe ekzekutim, thuhet në një raport të publikuar më 4 shkurt nga Amnesty International.
Organizata ndërkombëtare për mbrojtjen e të drejtave të njeriut bazohet në 25 intervista të detajuara, të zhvilluara gjatë vitit 2025 me persona që kanë ikur nga Koreja e Veriut, kryesisht në periudhën 2012–2020.
Sipas dëshmive të mbledhura, regjimi i Koresë së Veriut ushtron kontroll të fortë dhe ndëshkim ekstrem ndaj çdo kontakti me përmbajtje kulturore të huaj, veçanërisht ndaj atyre që vijnë nga Koreja e Jugut.
Amnesty International thekson se shikimi apo mbajtja e serialeve, filmave apo muzikës koreano-jugore mund të dënohet me 5 deri në 15 vjet punë të detyruar, bazuar në ligjin e miratuar në vitin 2020, i njohur si Ligji kundër mendimeve dhe kulturave reaksionare. Ky ligj parashikon dënime edhe më të rënda, deri në dënim me vdekje, në rastet kur bëhet fjalë për shpërndarje të sasive të mëdha të materialeve të huaja ose organizim të shikimeve kolektive.
Organizata shton se raportime për ekzekutime për shpërndarjen e videove të huaja kanë ekzistuar edhe para miratimit të këtij ligji, çka tregon se praktikat represive kanë qenë të vazhdueshme.
Megjithatë, Amnesty International thekson se për shkak të izolimit ekstrem të Koresë së Veriut, kufizimit të informacionit dhe mbylljes së kufijve në periudhën 2020–2023, nuk mund të konfirmojë në mënyrë të pavarur shkallën aktuale të përdorimit të dënimit me vdekje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
