Ekipet e shpëtimit në Venezuelë vijojnë garën me kohën për të gjetur të mbijetuarit pas tërmeteve të fuqishme me magnitudë 7.2 dhe 7.5 që goditën vendin të mërkurën.
Sipas autoriteteve, numri i viktimave ka arritur në të paktën 1,430, ndërsa mijëra persona rezultojnë ende të zhdukur, raporton BBC.
Një nga zonat më të prekura është shteti bregdetar i La Guaira, pranë kryeqytetit Karakas, ku qindra ndërtesa janë shembur.
Banorët kërkojnë me mjete të thjeshta mes rrënojave për të afërmit e tyre, ndërsa ekipet e shpëtimit përdorin edhe dronë për të lokalizuar të mbijetuarit.
Sipas Organizatës së Kombeve të Bashkuara, rreth 50 mijë persona rezultojnë të zhdukur.
Agjencitë humanitare theksojnë se 48 deri në 72 orët e para pas një tërmeti janë vendimtare për shpëtimin e njerëzve të bllokuar nën rrënoja.
Për t'i ardhur në ndihmë Venezuelës, ekipe shpëtimi nga Meksika, Spanja, Shtetet e Bashkuara, Mbretëria e Bashkuar dhe disa vende të tjera kanë mbërritur në zonat e prekura, megjithatë autoritetet pranojnë se nevojiten më shumë pajisje dhe personel.
Presidentja e përkohshme Delcy Rodríguez deklaroi se qeveria ka mobilizuar të gjitha kapacitetet për operacionet e kërkim-shpëtimit dhe ndihmën humanitare, ndërsa banorët e zonave të goditura përballen me mungesë strehimi, ujit dhe furnizimeve bazë.
Shumë familje janë detyruar të kalojnë netët në automjete ose në hapësira të hapura, pasi ndërtesat janë dëmtuar rëndë dhe konsiderohen të pasigurta.
Mes dhimbjes për humbjet njerëzore dhe materiale, përpjekjet për të gjetur të mbijetuar vazhdojnë pa ndërprerje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
