Korpusi i Gardës Revolucionare Islamike të Iranit (IRGC) deklaroi se ka ndërmarrë një sulm ndaj një baze ajrore amerikane në Lindjen e Mesme, të cilën e konsideron burimin e sulmeve amerikane ndaj objektivave iraniane pranë qytetit portual Bandar Abbas.
Sipas mediave shtetërore iraniane, IRGC tha se sulmi erdhi si përgjigje ndaj një operacioni ushtarak amerikan të kryer në orët e para të mëngjesit të së enjtes. Agjencia iraniane e lajmeve Fars raportoi, duke cituar një deklaratë të Gardës Revolucionare, se baza ajrore amerikane “e identifikuar si burimi i agresionit” u godit rreth orës 04:50 të mëngjesit.
IRGC nuk specifikoi vendndodhjen e bazës së shënjestruar, ndërsa Shtetet e Bashkuara kanë një numër bazash ushtarake në rajonin e Lindjes së Mesme.
Në deklaratën e saj, Garda Revolucionare e cilësoi operacionin si “një paralajmërim serioz” për SHBA-në, duke theksuar se “agresioni nuk do të mbetet pa përgjigje”.
Në të njëjtën kohë, Ushtria e Kuvajtit njoftoi se sistemet e saj të mbrojtjes ajrore kishin interceptuar dronë dhe raketa “armiqësore”, pa bërë të ditur origjinën e tyre.
Më herët, tre shpërthime u dëgjuan në lindje të Bandar Abbasit, një qytet strategjik iranian pranë Ngushticës së Hormuzit.
Një zyrtar amerikan konfirmoi se ushtria amerikane kishte rrëzuar katër dronë iranianë dhe kishte goditur një stacion kontrolli tokësor iranian që po përgatitej të lëshonte një dron të pestë.
Komanda Qendrore e SHBA-së ende nuk ka reaguar zyrtarisht ndaj pretendimeve të Iranit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
