Një sipërmarrës rus i cili projekton dronë të përdorur në vijat e frontit në Ukrainë u qëllua dhe u plagos të mërkurën në një atentat në Tula, në Rusinë perëndimore, njoftuan kompania e tij dhe autoritetet lokale.
“Sulmi kishte në shënjestër Andrei Cherezov, projektuesin kryesor dhe zhvilluesin e familjes ‘Ovod’ të dronëve FPV”, tha kompania, e quajtur edhe “Ovod”, për agjencinë ruse të lajmeve RIA Novosti.
Sipas kompanisë, sipërmarrësi mori dekorata zyrtare nga shteti rus dhe mori pjesë personalisht në provat me dronë në vijat e frontit në Ukrainë.
Në një deklaratë të postuar në llogarinë e tij VK, Komiteti Hetimor Rus i rajonit Tula, rreth 200 kilometër në jug të Moskës, kishte njoftuar më parë se një person i paidentifikuar kishte hapur zjarr ndaj një biznesmeni në Tula të mërkurën, në hollin e një ndërtese banimi, dhe se viktima ishte shtruar në spital.
Në vitin 2024, në një raport me agjencinë e lajmeve Ria Novosti, një zyrtar nga kompania Ovod prezantoi një nga modelet e saj më të fundit të droneve FPV, pajisje të përdorura gjerësisht në frontin ukrainas.
Që nga fillimi i ofensivës në shkallë të gjerë ruse kundër Ukrainës në shkurt 2022, disa vrasje ose tentativa vrasjesh, ndonjëherë të pretenduara nga Kievi, kanë synuar zyrtarë dhe personel ushtarak rusë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
