Norvegjia dhe Russia vazhdojnë të bashkëpunojnë në menaxhimin e rezervave të merlucit në detin Barent, pavarësisht tensioneve të forta politike mes Moskës dhe Perëndimit.
Marrëveshja, që mediat ndërkombëtare e kanë quajtur “Pakti i Merlucit”, bazohet në një marrëveshje të vitit 1975 dhe konsiderohet thelbësore për ruajtjen e një prej rezervave më të mëdha të merlucit në botë.
Sipas Financial Times, ky bashkëpunim është një nga kanalet e rralla ku kontaktet mes Rusisë dhe një vendi anëtar të NATO-s kanë mbetur aktive edhe pas luftës në Ukrainë.
Shkencëtarët argumentojnë se menaxhimi i përbashkët ka ndihmuar në shmangien e mbipeshkimit dhe në ruajtjen e ekuilibrit ekologjik në rajon.
Megjithatë, marrëveshja ka ngritur shqetësime në disa qarqe europiane. Zyrtarë dhe analistë të sigurisë druhen se aktivitetet e flotave ruse të peshkimit mund të përdoren edhe për qëllime të tjera, si mbledhja e informacionit mbi infrastrukturat kritike, monitorimi i zonave strategjike apo aktivitete të mundshme spiunazhi në Arktik.
Komisioneri europian për Peshkimin, Costas Kadis, ka kërkuar rishikimin e marrëveshjes me Norvegjinë, duke theksuar se çështjet e sigurisë nuk mund të neglizhohen.
Debati bëhet edhe më i ndjeshëm për shkak të rëndësisë strategjike që po merr Arktiku, sidomos pas interesit në rritje të SHBA-së për Greenland dhe zhvillimeve të reja gjeopolitike në rajon.
Nga ana tjetër, Norvegjia mbetet një furnizues kyç energjie për shumë vende europiane, gjë që e bën më të vështirë presionin politik ndaj Oslos për ndërprerjen e bashkëpunimit me Rusinë në këtë sektor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
