Qeveria siriane njoftoi se është arritur armëpushimi me Forcat Demokratike Siriane (SDF), duke marrë pothuajse kontroll të plotë mbi vendin dhe duke shpërbërë forcat e udhëhequra nga kurdët që kishin kontrolluar verilindjen për më shumë se një dekadë.
Njoftimi vjen në një kohë kur tensionet mes forcave qeveritare dhe SDF-së u përshkallëzuan më herët këtë muaj, duke çuar përfundimisht në një ofensivë të madhe të forcave qeveritare drejt Lindjes. SDF-ja duket se është tërhequr kryesisht pas përplasjeve fillestare në një zonë të vijës së frontit të tensionuar në provincën lindore të Alepos.
Ministria e Mbrojtjes e Sirisë tha se kishte urdhëruar ndalimin e luftimeve në vijat e frontit pasi u njoftua marrëveshja. SDF-ja nuk e konfirmoi marrëveshjen dhe as nuk iu përgjigj menjëherë kërkesës për koment nga Associated Press.
Udhëheqësit e rinj të Sirisë, që prej rrëzimit të Bashar Asadit në dhjetor 2024, kanë pasur vështirësi të vendosin autoritetin e tyre të plotë mbi vendin e shkatërruar nga lufta. Një marrëveshje u arrit në mars që parashikonte bashkimin e SDF-së me Damaskun, por ajo nuk pati jehonë, pasi të dyja palët akuzuan njëra-tjetrën për shkeljen e marrëveshjes.
Që nga ofensiva, qeveria ka vendosur kryesisht kontrollin mbi provincat Deir el-Zour dhe Raqqa, zona kyçe që më parë ishin nën kontrollin e SDF-së dhe që përfshijnë fusha nafte dhe gazi, diga përgjatë lumit Eufrat si edhe pika kufitare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
