Ekipet e shpëtimit në Kiev po vazhdojnë kërkimet për persona të bllokuar nën rrënojat e ndërtesave të banimit të dëmtuara rëndë, pasi të paktën nëntë persona humbën jetën në valën e dytë të sulmeve ruse ndaj kryeqytetit ukrainas brenda një jave, raporton BBC.
Administratori ushtarak i Kievit, Timur Tkachenko, bëri të ditur se 46 persona janë plagosur, mes tyre të paktën pesë fëmijë.
Sulmet ndodhën në prag të samitit të NATO-s në Turqi, ku presidenti ukrainas Volodymyr Zelensky pritet të zhvillojë bisedime me presidentin e SHBA-së, Donald Trump.
Vetëm disa orë para sulmeve, Zelensky paralajmëroi se Moska po përgatiste një "valë të dytë sulmesh masive" ndaj Kievit, pas bombardimeve të së enjtes, ku humbën jetën 30 persona.
Sipas kryebashkiakut të Kievit, Vitali Klitschko, raketat balistike ruse goditën disa objekte në pjesë të ndryshme të qytetit, ndërsa shpërthyen zjarre në disa komplekse banimi.
Ai shtoi se nga sulmet u dëmtuan edhe depo dhe një punishte garazhesh.
Fotografitë e publikuara nga Kievi tregojnë ndërtesa të shkatërruara, rrënoja që vazhdojnë të digjen dhe automjete të djegura në zona të ndryshme të qytetit. Ekipet e shpëtimit vijojnë operacionet e kërkim-shpëtimit mes rrënojave për të gjetur të mbijetuar.
Të dielën, disa orë para sulmeve, Zelensky deklaroi se informacionet e inteligjencës tregonin se Rusia po përgatiste një valë të re sulmesh ndaj kryeqytetit ukrainas.
Pas sulmeve intensive me raketa dhe dronë gjatë natës së të enjtes, dhjetëra mijëra banorë u strehuan në stacionet e metrosë, ndërsa alarmet ajrore u aktivizuan në orët e para të mëngjesit të së premtes.
Ukraina akuzoi Rusinë se kishte shënjestruar qëllimisht zonat civile, duke lënë të paktën 30 të vdekur.
Nga ana tjetër, Moska deklaroi se objektivat e sulmeve ishin bazat ushtarake dhe infrastruktura energjetike, në përgjigje të sulmeve të fundit ukrainase ndaj objekteve energjetike në territorin rus.
Sulmet vazhduan edhe gjatë natës, duke shkaktuar ndërprerje të përkohshme të energjisë elektrike në qytetin e Sevastopolit, në Krimenë e pushtuar nga Rusia.
Në prag të samitit të NATO-s, Zelensky u bëri thirrje aleatëve të përshpejtojnë dërgesat e raketave me rreze të gjatë veprimi, të nevojshme për mbrojtjen e Ukrainës.
Në një postim në platformën X, ai shkroi: "Çdo vonesë në furnizimin me raketa për mbrojtjen tonë ajrore nënkupton humbje jetësh dhe i jep Rusisë më shumë mundësi për të vazhduar luftën."
Zelensky i bëri thirrje gjithashtu Shteteve të Bashkuara t'i japin Ukrainës licencë për prodhimin e raketave mbrojtëse Patriot.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
