Mbi 370,000 fëmijë janë detyruar të largohen nga shtëpitë e tyre në Liban si pasojë e ofensivës së Izraelit kundër Hezbollahut, ndërsa të paktën 121 fëmijë kanë humbur jetën dhe 399 të tjerë janë plagosur.
Kështu bëri të ditur përfaqësuesi i UNICEF-it në Liban, Marcoluigi Corsi, sipas raportimeve të Reuters.
Situata në terren mbetet e rëndë, ndërsa autoritetet izraelite kanë shpallur synimin për të krijuar një “zonë sigurie” deri në lumin Litani, rreth 30 kilometra në veri të kufirit me Izraelin.
Ministri i Mbrojtjes i Izraelit, Israel Katz, deklaroi se qindra mijëra banorë shiitë nuk do të lejohen të rikthehen në jug të këtij lumi derisa të garantohet siguria për veriun e Izraelit.
Ndërkohë, një zyrtar i UNHCR-së vlerëson se rreth 150,000 persona kanë mbetur të izoluar brenda Libanit, kryesisht për shkak të shkatërrimit të urave dhe infrastrukturës kryesore.
Zyrtarë ndërkombëtarë kanë ngritur shqetësime për përshkallëzimin e retorikës dhe veprimeve ushtarake në jug të Libanit. Një përfaqësues i OKB-së theksoi se është jetike që të respektohen plotësisht integriteti territorial dhe sovraniteti i Libanit.
Kriza humanitare vijon të thellohet, ndërsa organizatat ndërkombëtare bëjnë thirrje për mbrojtjen e civilëve, veçanërisht të fëmijëve, që po paguajnë çmimin më të lartë të konfliktit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
