Çmimi i naftës zbret me 5.5% pas sinjaleve për marrëveshje mes SHBA-së dhe Iranit

Çmimet globale të naftës kanë shënuar rënie të fortë këtë të hënë, pas sinjaleve optimiste për një marrëveshje të mundshme mes Shteteve të Bashkuara dhe Iranit, e cila mund të çojë drejt përfundimit të konfliktit në Lindjen e Mesme dhe rihapjes së Ngushticës së Hormuzit.

Nafta Brent ra me 5.5%, duke zbritur në 97.90 dollarë për fuçi gjatë orëve të para të mëngjesit dhe duke u stabilizuar më pas rreth 97.70 dollarë për fuçi. Rënia erdhi pasi Sekretari amerikan i Shtetit, Marco Rubio, deklaroi se negociatorët kishin në tryezë një “propozim mjaft të fortë” dhe se një marrëveshje mund të arrihej që të hënën.

Presidenti amerikan Donald Trump tha se negociatat po “ecin mirë”, por paralajmëroi se rezultati do të ishte ose “një marrëveshje e shkëlqyer për të gjithë, ose asnjë marrëveshje”.

Nga ana tjetër, Irani konfirmoi progres në bisedime, por theksoi se një marrëveshje finale nuk është ende afër. Zëdhënësi i Ministrisë së Jashtme iraniane, Esmail Baqai, deklaroi se është arritur dakordësi për “një pjesë të madhe të çështjeve”, por shtoi se askush nuk mund të pretendojë ende se marrëveshja është gati për nënshkrim.

Një nga pikat kyçe të negociatave mbetet rihapja e Ngushticës së Hormuzit, rruga detare përmes së cilës kalon rreth një e pesta e furnizimit botëror me naftë dhe gaz natyror të lëngshëm. Kjo ngushticë është bllokuar praktikisht që nga fillimi i konfliktit më 28 shkurt.

Tensionet në rajon kanë shkaktuar luhatje të mëdha në tregjet globale të energjisë gjatë muajve të fundit. Megjithëse çmimet e naftës kanë rënë ndjeshëm ditët e fundit, ato mbeten shumë më të larta krahasuar me periudhën para nisjes së luftës, kur nafta Brent tregtohej rreth 70 dollarë për fuçi.

Ekspertët paralajmërojnë se edhe në rast të një marrëveshjeje të shpejtë, rikthimi i plotë i tregjeve dhe zinxhirëve të furnizimit do të kërkojë kohë. Saul Kavonic, drejtues i kërkimeve për energjinë në MST Financial, tha se “ka dritë në fund të tunelit”, por shtoi se tregjet do të mbeten të tensionuara deri në vitin 2027 për shkak të dëmeve në infrastrukturë dhe mungesës së rezervave globale të naftës.