Qyteti italian kërkon “vlerësues të aromave” për të nuhatur aromat e këqija

Një qytet italian po kërkon një ekip nuhatësish për të identifikuar aromat e këqija në përpjekje për të përmirësuar cilësinë e ajrit.

Bruno Beltrame, kryebashkiaku i Brendolës, një qytet i vogël në provincën veriore të Vicencës, tha se filloi fushatën e rekrutimit për gjashtë “vlerësues të aromave” pas ankesave për erëra të pakëndshme nga njerëzit që jetojnë në lagje afër zonave industriale.

Kushti kryesor për këtë rol është të mos vuani nga alergjitë ose sëmundjet e frymëmarrjes si astma. Të rekrutuarit duhet të kenë një makinë dhe një telefon inteligjent, i cili do të përdoret për të regjistruar të dhënat e aromave në një aplikacion të dedikuar.

Të udhëhequr nga një firmë e specializuar në matjen e aromave, ata do të trajnohen se si të dallojnë aromat, ato që emetohen zakonisht nga fabrikat ose që burojnë nga mbetjet industriale ose ujërat e zeza.

Pastaj do t’u jepet detyra të shkojnë në zona të caktuara për të kryer vlerësime shqisore. Nëse zbulohet një erë e pakëndshme, ata do të kalojnë kohë duke nuhatur ajrin përpara se të regjistrojnë perceptimet e tyre në aplikacion.

Qëllimi përfundimtar i iniciativës, e cila pritet të zgjasë gjashtë muaj, është të gjurmojë origjinën e aromave.

“Ne bëmë një hetim të ngjashëm rreth pesë vjet më parë në një zonë industriale afër vendit nga vijnë tani aromat e këqija”, tha Beltrame.

Ne ishim në gjendje të identifikonim kompanitë që lëshonin aromat e këqija. Tani po zgjerojmë shtrirjen gjeografike për të zbuluar nëse të njëjtat kompani kanë rifilluar lëshimin e aromave të këqija apo nëse ka të tjera. Jemi në fund të luginës pak para kodrave alpine. Është një sipërmarrje e madhe sepse këto zona janë ndër më produktivet, por janë gjithashtu ato që rrezikojnë të krijojnë ndotje. Ne kemi shumë protokolle në vend dhe nëse bizneset shkelin rregullat, ato gjobiten rëndë.

 

Viçenca bie brenda luginës së lumit Po, një zonë e madhe gjeografike që shtrihet në provincat përreth rajonit të Venetos, si dhe në Piemonte, Lombardi dhe Emilia-Romanja. Lugina e lumit Po është ndër zonat më të këqija në Evropë për nga ndotja e ajrit.

Brendola është shtëpia e rreth 4000 personave të cilët me kalimin e viteve janë bërë më të përkushtuar për të mbrojtur mjedisin e tyre. 

Autoriteti lokal fillimisht shpalli njoftimin për vendet e punës, të cilat paguhen, para Krishtlindjeve, por nuk pati asnjë kandidat, ndoshta për shkak se u publikua afër festave.

Por që nga ripostimi i njoftimit në Facebook këtë javë, me dhjetëra persona aplikuan.