Irani zhvilloi një ceremoni masive mortore për 165 nxënëse dhe anëtarë stafi të vrarë në një shkollë vajzash në Minab, në provincën Hormozgan, në atë që Teherani e cilëson si sulm të përbashkët të Shteteve të Bashkuara të Amerikës dhe Izraelit.
Ushtria izraelite deklaroi se nuk ka dijeni për ndonjë sulm në atë zonë. Ndërkohë, gjatë ceremonisë në Minab, mijëra qytetarë valëvitën flamuj dhe brohoritën kundër SHBA-së dhe Izraelit, duke kërkuar drejtësi për viktimat.
Ministri i Jashtëm i Iranit, Abbas Araghchi, akuzoi Uashingtonin dhe Tel Avivin për “vrasjen e mbi 160 vajzave të pafajshme”, duke e quajtur sulmin krim të rëndë. Nga ana tjetër, Sekretari amerikan i Shtetit, Marco Rubio, tha se çështja do të hetohet nga strukturat përkatëse ushtarake.
Ngjarja është dënuar nga UNESCO dhe nga fituesja e Çmimit Nobel për Paqen, Malala Yousafzai. Zyra e OKB-së për të Drejtat e Njeriut bëri thirrje për hetim të pavarur dhe të plotë mbi rrethanat e sulmit.
Sulmi konsiderohet një nga incidentet më vdekjeprurëse në përshkallëzimin e fundit mes Teheranit dhe aleatëve perëndimorë, ndërsa tensionet në rajon vazhdojnë të rriten.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
