Tre gazetarë janë vrarë në një sulm ajror izraelit në jug të Libanit, teksa po raportonin mbi përshkallëzimin e konfliktit mes Izraelit dhe Hezbollahut, njofton BBC.
Televizioni i Hezbollahut, Al-Manar, njoftoi se korrespondenti i tij i kahershëm, Ali Shoeib, humbi jetën gjatë sulmit.
Nga ana tjetër, ushtria izraelite deklaroi se e kishte shënjestruar atë, duke pretenduar se ishte operativ i inteligjencës së Hezbollahut, pa paraqitur prova publike.
Ndërkohë, televizioni pan-arab me bazë në Bejrut, Al-Mayadeen, bëri të ditur se në të njëjtin sulm u vra edhe gazetarja Fatima Ftouni, së bashku me vëllain e saj Mohammed, i cili punonte si kameraman.
Sipas raportimeve, Ftouni ishte në transmetim të drejtpërdrejtë pak çaste para goditjes.
Zyrtarë të lartë në Liban e dënuan sulmin, ndërsa presidenti Joseph Aoun e cilësoi atë një krim të rëndë.
Edhe Komiteti për Mbrojtjen e Gazetarëve reagoi, duke theksuar se “gazetarët nuk janë objektiva legjitime, pavarësisht mediumit për të cilin punojnë”.
Në zhvillime të tjera, qeveria e njohur ndërkombëtarisht e Jemenit akuzoi Iranin për përpjekje të vazhdueshme për ta tërhequr vendin në konfliktin e Lindjes së Mesme. Më herët, rebelët Huthi të mbështetur nga Irani nisën një sulm me raketa drejt Izraelit, për herë të parë që nga fillimi i luftës.
Ndërkohë, Irani ka akuzuar SHBA-të dhe Izraelin për një tjetër sulm, këtë herë ndaj një klinike mjekësore në Minab.
Sipas zyrtarëve iranianë, sulmi shkaktoi dëme materiale, por nuk u raportuan të lënduar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
