Qeveritë e Bashkimit Evropian kanë rënë dakord të bllokojnë për një kohë të pacaktuar asetet ruse me vlerë deri në 210 miliardë euro të cilat janë ngrirë në BE që nga fillimi i pushtimit të plotë të Ukrainës nga Rusia.
Shumica e parave të gatshme të Moskës mbahen në bankën belge Euroclear dhe udhëheqësit evropianë shpresojnë të bien dakord për një marrëveshje në samitin e rëndësishëm të BE-së javën e ardhshme. Nëse ka dakordësi paratë mund të përdoren për një kredi për të ndihmuar Kievin të financojë ushtrinë dhe ekonominë e tij.
Pas pothuajse katër vitesh luftë në shkallë të plotë të Rusisë, Ukrainës po i mbarojnë paratë dhe i duhen rreth 135.7 miliardë euro gjatë dy viteve të ardhshme.
Evropa synon të sigurojë dy të tretat e kësaj shume, por zyrtarët rusë e akuzojnë BE-në për vjedhje.
Banka Qendrore Ruse tha të premten se po padit bankën belge Euroclear në një gjykatë në Moskë, në përgjigje të planit të kredisë së BE-së.
Asetet e Rusisë në BE u ngrinë brenda disa ditësh nga pushtimi i plotë i Ukrainës në shkurt 2022, dhe 185 miliardë euro nga kjo shumë mbahet nga Euroclear.
BE-ja dhe Ukraina argumentojnë se paratë duhet të përdoren për të rindërtuar atë që Rusia ka shkatërruar: Brukseli e quan atë një "kredi dëmshpërblimi" dhe ka hartuar një plan për të mbështetur ekonominë e Ukrainës në shumën prej 90 miliardë eurosh.
“Është e drejtë që asetet e ngrira të Rusisë të përdoren për të rindërtuar atë që Rusia ka shkatërruar dhe ato para të bëhen tonat”, thotë Volodymyr Zelensky i Ukrainës.
Kancelari gjerman Friedrich Merz thotë se asetet do t'i mundësojnë Ukrainës të mbrohet në mënyrë efektive nga sulmet e ardhshme ruse. Por nuk është vetëm Moska që është e pakënaqur.
Belgjika është e shqetësuar se do të përballet me një faturë të madhe nëse gjithçka shkon keq dhe drejtoresha ekzekutive e Euroclear, Valérie Urbain, thotë se përdorimi i saj mund të “destabilizojë sistemin financiar ndërkombëtar”.
Euroclear gjithashtu ka rreth 16-17 miliardë euro të palëvizshme në Rusi.
Kryeministri belg Bart De Wever i ka vënë BE-së një sërë “kushtesh racionale, të arsyeshme dhe të justifikuara” përpara se të pranojë planin e dëmshpërblimeve dhe ka refuzuar të përjashtojë veprimet ligjore nëse kjo “paraqet rreziqe të konsiderueshme” për vendin e tij.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
