Departamenti i Shtetit i SHBA-së vendosi të martën ndalimin e vizave për ish-komisionarin e Bashkimit Evropian, Thierry Breton, dhe katër aktivistë evropianë, duke i akuzuar ata për presion mbi platformat amerikane të rrjeteve sociale për të censuruar përdoruesit dhe pikëpamjet e tyre.
Sipas Euronews, Sekretari i Shtetit, Marco Rubio, deklaroi se të pesë personat “kanë udhëhequr përpjekje të organizuara për të detyruar platformat amerikane të censurojnë, demonetizojnë dhe shtypin pikëpamjet që nuk i pëlqejnë”.
Breton, ish-komisionar për Tregun e Brendshëm (2019–2024), është quajtur “mendja kryesore” pas Aktit të Shërbimeve Dixhitale të BE-së (DSA), i cili vendos rregulla për moderimin e përmbajtjes dhe standarde të tjera për platformat sociale që veprojnë në Evropë.
Të tjerët e ndaluar për vizë janë: Anna-Lena von Hodenberg dhe Josephine Ballon nga organizata gjermane HateAid, Clare Melford nga Global Disinformation Index në MB, dhe Imran Ahmed, drejtori britanik i Center for Countering Digital Hate me bazë në SHBA.
Breton reagoi në X duke e quajtur vendimin një “gjueti shtrigash si ajo e McCarthy-t” dhe theksoi se DSA u miratua unanimisht nga 90% e Parlamentit Evropian dhe të gjitha 27 shtetet anëtare.
Ministri i Jashtëm francez, Jean-Noël Barrot, dënoi vendimin, duke thënë se Europa nuk mund të lejojë që rregullat për hapësirën e saj dixhitale të imponohen nga jashtë. Komisioni Evropian ka mohuar më herët akuzat për censurë dhe i ka cilësuar ato si “të pabazuara dhe pa asnjë argument”.
Kjo masë e SHBA-së vjen pas një letre të Breton drejtuar Elon Musk, ku i kujtonte atij detyrimet ligjore nën DSA, dhe ka shkaktuar polemika mbi ndikimin e ligjeve evropiane në kompanitë amerikane të teknologjisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
