Rusia nuk ka ndërmend të nisë një sulm ushtarak ndaj një shteti anëtar të NATO-s këtë vit ose vitin tjetër, por po përshpejton rindërtimin e forcave të saj në një kohë kur edhe Europa po riarmatoset, sipas raportit vjetor të shërbimit të inteligjencës së jashtme të Estonisë, të publikuar të martën.
Estonia, një shtet anëtar i NATO-s që kufizohet me Rusinë, ka qenë një nga kritiket më të ashpra të Moskës dhe një mbështetëse e fortë e Ukrainës.
“Europa duhet të investojë në mbrojtje dhe siguri të brendshme në mënyrë që në të ardhmen Rusia të kuptojë se nuk ka asnjë shans për fitore kundër vendeve të NATO-s ”, u tha gazetarëve kreu i agjencisë së inteligjencës, Kaupo Rozin.
Ne shohim se udhëheqja ruse është thellësisht e shqetësuar për riarmatim europian. Ajo beson se brenda dy deri në tre vite Europa mund të ndërmarrë veprime të pavarura ushtarake kundër Rusisë.
Sipas tij, qëllimi i Rusisë tani është të vonojë dhe pengojë këtë zhvillim.
Prodhimi i municioneve po rritet me një ritëm që i lejon Rusisë të grumbullojë furnizime për luftërat e ardhshme, ndërsa vazhdon të luftojë në Ukrainë, sipas agjencisë së inteligjencës.
Çdo sulm rus ndaj Estonisë do të përfshinte dronë në tokë, në ajër dhe në det, njëkohësisht mbi të gjithë territorin e Estonisë, shtoi Rozin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
