Lavrov: Rusia dhe Koreja e Veriut luftojnë për një rend botëror të ri dhe të drejtë

Ministri i Jashtëm rus Sergei Lavrov i tha homologut të tij të Koresë së Veriut se vendet e tyre po punonin për të krijuar një rend botëror të ri dhe të drejtë, pasi Pheniani ndihmoi Moskën të dëbonte forcat ukrainase nga një rajon rus vitin e kaluar.

Në një mesazh drejtuar Ministrit të Jashtëm të Koresë së Veriut, Choe Son Hui, Lavrov riafirmoi angazhimin e Moskës për të rritur bashkëpunimin në të gjitha fushat dhe për të kontribuar në sigurinë rajonale dhe ndërkombëtare, tha të martën agjencia e lajmeve KCNA e Koresë së Veriut.

Lideri i Koresë së Veriut, Kim Jong Un, dërgoi rreth 14.000 ushtarë në Rusi në fund të vitit 2024 për të ndihmuar Moskën të zmbrapste një inkursion të madh ukrainas në rajonin e Kurskut. 

Presidenti rus Vladimir Putin shpalli fitoren në maj 2025 dhe falënderoi publikisht Phenianin për ndihmën e tij.

Koreja e Veriut dhe Rusia po vazhdojnë të krijojnë një “rend botëror të ri dhe të drejtë mbi bazën e barazisë së vërtetë dhe interesave kombëtare”, citoi KCNA Lavrovin në mesazhin e tij.

“Pjesëmarrja e personelit ushtarak të Ushtrisë Popullore Koreane në operacionet për të dëbuar klikën naziste ukrainase dhe mercenarët e huaj nga Kursku është një provë e qartë e traditës së miqësisë militante të farkëtuar nga brezat heroikë të mëparshëm”, tha Lavrov.

Që nga ndërhyrja ushtarake në Ukrainë në shkurt të vitit 2022, Rusia shpesh është përpjekur ta karakterizojë qeverinë e Presidentit Volodymyr Zelensky si “naziste” të vendosur për të persekutuar rusishtfolësit në Ukrainë. 

Koreja e Jugut dhe vendet perëndimore janë të shqetësuara se Pheniani mund të marrë ndihmë nga Moska me zhvillimin e armëve në këmbim të ndihmës së saj në Ukrainë.

Më herët gjatë këtij muaji, Zelensky tha se deri në 50.000 ushtarë të Koresë së Veriut do të dërgoheshin në Rusi në një vendosje të re për të ndihmuar në rritjen e presionit ushtarak mbi Ukrainën.

Pheniani i ka furnizuar Rusisë edhe miliona fishekë artilerie dhe mortajash, raketa balistike, artileri me rreze të gjatë veprimi dhe sisteme raketash me lëshim të shumëfishtë, sipas vlerësimeve ukrainase dhe të pavarura.