Policia në Çeki ka nisur një hetim intensiv për identifikimin e personit që vodhi kafkën 800-vjeçare të Shën Zdislavës së Lemberkut nga një kishë historike në veri të vendit.
Relikja e shenjtë u mor nga një kuti ekspozimi brenda bazilikës së Shën Lorencit dhe Shën Zdislavës në qytetin Jablonne v Podjestedi, rreth 110 kilometra larg Pragës.
Pamjet e kamerave të sigurisë, të publikuara nga autoritetet, tregojnë një person të veshur me të zeza duke lëvizur me shpejtësi mes stolave të kishës, ndërsa mbante objektin e vjedhur.
Fillimisht policia e identifikoi të dyshuarin si mashkull, por më vonë deklaroi se ende nuk ka një konfirmim të qartë për identitetin apo gjininë e autorit.
Sipas zëdhënëses së policisë, Dagmar Sochorova, vlera financiare e relikes është ende në verifikim, por rëndësia e saj historike dhe shpirtërore konsiderohet e paçmueshme.
Shën Zdislava e Lemberkut ishte një fisnike çeke e shekullit XIII, e njohur për ndihmën ndaj të varfërve dhe përkushtimin fetar. Ajo u shenjtërua nga Papa Gjon Pali II në vitin 1995.
Ngjarja ka shkaktuar reagime të forta në komunitetin fetar. Kryepeshkopi i Pragës, Stanislav Pribyl, e cilësoi vjedhjen si “një lajm shkatërrues”, duke theksuar se relikja ishte prej dekadash objekt adhurimi për pelegrinët që vizitonin kishën në Jablonne, vendi ku shenjtorja jetoi dhe veproi më shumë se 750 vite më parë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
