Të paktën 20 persona kanë humbur jetën dhe 32 të tjerë janë plagosur pas sulmeve ajrore që, sipas një deklarate të publikuar nga Forcat e Mobilizimit Popullor (PMF), janë kryer nga forcat amerikane dhe saudite kundër objektivave të lidhura me Iranin në Irak.
Sipas PMF-së, sulmet kanë goditur objekte të përshkruara si qendra logjistike dhe depo armësh në disa provinca të Irakut, përfshirë Bagdadin, Wasitin, Ninevehën, Basrën, Kirkukun, Qerbelanë dhe Diyalanë. Grupi pretendon se bombardimet kanë shkaktuar dëme në disa baza ushtarake, automjete dhe pajisje.
Brigada e 30-të e PMF-së deklaroi më herët se shtatë sulme ajrore kishin goditur pika strategjike në provincën Nineveh, në veri të Irakut, rreth orës 03:20 me kohën lokale. Sipas kësaj deklarate, nga sulmet mbetën të vrarë 10 persona dhe u plagosën gjashtë të tjerë.
Pas zhvillimeve të fundit, kryeministri irakian Ali Falih Al-Zaidi ka thirrur një mbledhje urgjente të Këshillit Ministror për Sigurinë Kombëtare për të diskutuar situatën dhe reagimin e autoriteteve.
Sulmet pritet të rrisin më tej tensionet mes aktorëve rajonalë dhe ndërkombëtarë në Irak, ku grupet e armatosura të lidhura me Iranin kanë pasur përplasje të vazhdueshme me forcat amerikane dhe aleatët e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
