Një raport i Institutit Ndërkombëtar të Studimeve Strategjike (IISS) pretendon se Rusia ka zhvilluar një fushatë të koordinuar mbikëqyrjeje me dronë, e cila zgjati rreth 18 muaj dhe kishte në shënjestër centrale bërthamore, baza ushtarake dhe infrastruktura strategjike në Mbretërinë e Bashkuar, Francë, Belgjikë, Holandë dhe vende të tjera evropiane.
Sipas analizës së IISS, e cila shqyrtoi 144 incidente në më shumë se një duzinë shtetesh që nga fundi i vitit 2024, ekzistojnë indikacione se operacionet janë organizuar nga inteligjenca ushtarake ruse.
Raporti thekson se autoritetet evropiane nuk kanë arritur të ndalojnë apo të rrëzojnë asnjë nga dronët, duke nxjerrë në pah dobësi në mbrojtjen ajrore të vendeve të NATO-s.
Ndër objektivat kryesorë përmenden baza ajrore RAF Lakenheath në Britani, e përgatitur për të strehuar armë bërthamore amerikane, si dhe baza franceze e nëndetëseve bërthamore në Ile Longue. Studiuesit besojnë se dronët janë lëshuar nga anije të ashtuquajturës “flotë në hije”, të cilat operojnë me sistemet e identifikimit të fikura dhe lundrojnë pranë brigjeve evropiane.
Raporti përshkruan disa incidente konkrete. Në fund të nëntorit 2024, dronë u panë mbi RAF Lakenheath, RAF Fairford dhe baza të tjera amerikane në Angli. Dyshohet se ata mund të jenë nisur nga cisterna Seasons 1 ose nga anija e mallrave Hav Dolphin, e cila më vonë u lidh edhe me fluturime të ngjashme pranë një baze nëndetësesh në Gjermani.
Në një rast, një helikopter policie britanik u përpoq të ndiqte dronët, por operacioni u ndërpre për arsye sigurie. Gjithashtu ishte diskutuar përdorimi i një sistemi lazer kundër dronëve, por ideja nuk u zbatua.
Në dhjetor 2025, pesë dronë u zbuluan mbi bazën bërthamore franceze në Ile Longue, ndërsa në të njëjtën periudhë u raportuan fluturime edhe mbi bazat ajrore Kleine-Brogel në Belgjikë dhe Volkel në Holandë, ku ruhen armë bërthamore amerikane.
Sipas ekspertëve të IISS, Rusia ka përdorur teknika të zhvilluara gjatë luftës në Ukrainë, duke kombinuar anije për lëshimin e dronëve, mjete për rikuperimin e tyre dhe sisteme për përsëritjen e sinjaleve të kontrollit.
Charlie Edwards, bashkëpunëtor i lartë në IISS, deklaroi se vlerësimi i institutit është se “ka shumë gjasa” që Kremlini të ketë organizuar një operacion të koordinuar me mjete ajrore pa pilot në më shumë se një duzinë vendesh evropiane.
Sipas tij, kjo përbën një sukses taktik për Rusinë dhe një dobësi strategjike për mbrojtjen e aleatëve perëndimorë.
Raporti vlerëson se objektivat e operacionit kanë qenë mbledhja e informacionit mbi kapacitetet bërthamore, monitorimi i logjistikës ushtarake dhe zinxhirëve të furnizimit, si dhe ushtrimi i presionit ekonomik dhe psikologjik ndaj vendeve evropiane.
Numri më i madh i incidenteve u regjistrua gjatë vitit 2025, veçanërisht në Gjermani, ndërsa rastet kanë ardhur në rënie pasi disa shtete evropiane nisën të ndërhyjnë ndaj anijeve të flotës në hije gjatë vitit 2026.
Mes episodeve të tjera përmenden edhe fluturimet me dronë mbi Danimarkë, të cilat çuan në mbylljen e përkohshme të aeroportit të Kopenhagenit, si dhe incidenti me cisternën Boracay. Gjatë kontrollit të anijes u identifikuan dy shtetas rusë të lidhur me kompaninë private ushtarake Moran Security Group, çka, sipas raportit, përforcon dyshimet për përdorimin e flotës në hije në operacione të inteligjencës.
Studiuesit lidhin fushatën me GRU-në, shërbimin e inteligjencës ushtarake ruse, ndërsa theksojnë se janë përdorur modele të ndryshme dronësh. Një prej tyre mund të jetë Orlan-10, i aftë të fluturojë deri në 12 orë dhe të operojë në një distancë deri në rreth 300 milje nga pika e nisjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
