Qeveria australiane ka nisur një proces të madh ligjor kundër kompanisë amerikane 3M, duke kërkuar mbi 2 miliardë dollarë australianë dëmshpërblim për ndotjen e shkaktuar nga shkumat zjarrfikëse që përmbanin PFAS, të njohura si “kimikate të përhershme”.
Autoritetet australiane pretendojnë se produktet e përdorura për dekada në 28 baza ushtarake të vendit kanë shkaktuar pasoja serioze mjedisore, ekonomike dhe shëndetësore.
Prokurorja e Përgjithshme Michelle Rowland deklaroi se kjo është një nga paditë më të rëndësishme të ndërmarra ndonjëherë nga shteti australian, duke synuar rikuperimin e kostove të mëdha për hetimin dhe pastrimin e ndotjes.
Sipas qeverisë, 3M kishte garantuar më herët se substancat ishin të sigurta, biodegraduese dhe jo toksike, ndërsa më vonë u zbulua se kompania kishte teste të brendshme që tregonin ndikime serioze negative në mjedis.
Nga ana tjetër, 3M ka mohuar përgjegjësinë, duke deklaruar se nuk ka prodhuar PFAS në Australi dhe se shitja e këtyre produkteve ishte ndërprerë prej rreth dy dekadash.
PFAS-të janë kimikate industriale që nuk shpërbëhen natyrshëm dhe mund të grumbullohen në ujë, tokë dhe trupin e njeriut. Studime të ndryshme i kanë lidhur ato me dëmtime të mëlçisë, probleme në lindje dhe disa lloje kanceri.
Sipas Ministrisë Australiane të Mbrojtjes, deri tani janë shpenzuar mbi 1.3 miliardë dollarë australianë për menaxhimin e ndotjes, ndërsa janë trajtuar miliarda litra ujë dhe qindra mijëra tonë tokë e kontaminuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
