SHBA pretendon kontroll mbi sigurinë e Hormuzit, Trump paralajmëron tarifa 20% për transportet

Presidenti amerikan Donald Trump ka deklaruar se Shtetet e Bashkuara do të rivendosin një “bllokadë” ndaj porteve iraniane, duke njoftuar masa të reja lidhur me trafikun detar në Ngushticën e Hormuzit.

Në një postim në platformën Truth Social, Trump tha se ngushtica strategjike do të mbetet e hapur “me ose pa Iranin” dhe se SHBA-të do të marrin rolin e garantuesit të sigurisë në këtë zonë të rëndësishme për transportin global të energjisë.

Sipas tij, anijet që kalojnë nëpër këtë rrugë ujore do t’i nënshtrohen një tarife prej 20% për kostot e sigurisë, ndërsa masat do të zbatohen për të financuar operacionet amerikane në rajon.

Trump e përshkroi masën si një mënyrë për të kufizuar hyrje-daljet e anijeve që lidhen me Iranin, duke deklaruar se vendet e tjera do të kenë “përdorim të drejtë dhe të hapur” të Ngushticës së Hormuzit.

Deklarata vjen në një periudhë tensionesh të larta mes Uashingtonit dhe Teheranit, ndërsa Ngushtica e Hormuzit mbetet një nga pikat më të rëndësishme strategjike në botë, përmes së cilës kalon një pjesë e madhe e furnizimeve globale me naftë.