Një anije luftarake e fundosur gjatë Betejës së Kopenhagenit është zbuluar në brigjet e Kopenhagen pas më shumë se dy shekujsh, në një zbulim që ekspertët e cilësojnë si “të jashtëzakonshëm”.
Arkeologët detarë nga Muzeu Danez i Anijeve Vikinge identifikuan rrënojat e anijes “Dannebroge”, e cila u shkatërrua në vitin 1801 gjatë përballjes me flotën britanike të udhëhequr nga Horatio Nelson. Anija u gjet rreth 15 metra nën ujë, në kushte shumë të vështira kërkimi.
Sipas ekspertëve, përmasat e rrënojës përputhen plotësisht me dokumentet historike, ndërsa në vendngjarje janë zbuluar edhe gjyle topash, armë, si dhe objekte personale të ekuipazhit, përfshirë këpucë, fragmente veshjesh dhe pipa balte.
Gjetja më tronditëse është zbulimi i mbetjeve njerëzore, që besohet se i përkasin një prej marinarëve të zhdukur gjatë betejës. “Kemi gjetur eshtrat e atyre që nuk arritën kurrë të ktheheshin në breg”, deklaruan arkeologët.
“Dannebroge” ishte pjesë e mbrojtjes danezo-norvegjeze dhe u godit rëndë gjatë betejës, duke marrë flakë dhe më pas duke shpërthyer. Ngjarja la pas qindra viktima nga të dyja palët dhe mbetet një nga betejat më të përgjakshme detare të kohës.
Ky është hetimi i parë arkeologjik i kësaj beteje historike, ndërsa studimet pritet të përfundojnë së shpejti, me të gjitha gjetjet që po dokumentohen dhe skanohen në 3D.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
