Shefi i inteligjencës së Iranit, Esmail Khatib, ka akuzuar SHBA-në dhe Izraelin se po komplotonin për të vrarë Udhëheqësin Suprem Ayatollah Ali Khamenei, raportoi agjencia iraniane ISNA. Ai deklaroi se “armiku synon udhëheqësin suprem me tentativa vrasjeje apo sulme armiqësore”, duke iu referuar dy rivalëve kryesorë të Teheranit.
Nuk është e qartë nëse ministri aludonte për një plan konkret, por komentet e tij vijnë pas luftës 12-ditore midis Iranit dhe Izraelit në qershor, gjatë së cilës u vranë disa komandantë dhe shkencëtarë iranianë nga sulmet izraelite. Izraeli pretendoi se goditi objektet bërthamore për të ndalur Teheranin të zhvillonte armë bërthamore, ndërsa Irani e quajti ofensivën “të paprovokuar”.
Khatib paralajmëroi se “çdo person që vepron në këtë drejtim konsiderohet agjent infiltrues i armikut”, duke shtuar gjithashtu se Izraeli po përballet me “një valë infiltrimi iranian” brenda institucioneve të tij. Ai përmendi rastin e arrestimit të një oficeri të Forcave Ajrore Izraelite të dyshuar për spiunazh për Iranin, dhe pretendoi se Teherani ka marrë informacione bërthamore sekrete dhe dokumente shumë të ndjeshme.
Ministri tha se këto zhvillime tregojnë një ndryshim të balancës së fuqisë në rajon, sidomos pas përballjes së fundit ushtarake.
Komentet e tij pasuan raportet se, gjatë luftës, Izraeli kishte shqyrtuar mundësinë e eliminimit të Khamenit, një plan që ish-presidenti amerikan Donald Trump pretendohet se e kundërshtoi. Trump më vonë ka thënë se ka “kursyer” Khamenein nga një “vdekje shumë e shëmtuar”.
Khamenei, 86 vjeç, udhëheq Iranin që prej vitit 1989 dhe ka autoritet absolut mbi të gjitha institucionet e shtetit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
