Gjykata Supreme e Shtetve të Bashkuara të Amerikës ka hequr të gjitha kufizimet ndaj administratës Trump, duke i dhënë dritën jeshile për të përdorur një bazë të dhënash federale mjaft kontroverse që synon të identifikojë dhe fshijë nga listat zgjedhore votuesit e dyshuar si jo-qytetarë amerikanë, bën të ditur BBC.
Ky vendim vjen si një fitore e madhe politike dhe ligjore për administratën aktuale, e cila e ka vendosur "pastrimin e listave" dhe integritetin e votës në qendër të kauzës së saj politike.
Përmes këtij sistemi, agjencitë federale do të kenë të drejtë të kryqëzojnë të dhënat e ndjeshme të shtetësisë, statusit të emigracionit dhe dokumenteve të tjera personale për të rënë në gjurmët e personave pa të drejtë vote.
Bëhet fjalë për sistemin SAVE (Systematic Alien Verification for Entitlements), një program i Departamentit të Sigurisë Kombëtare që u lejon shteteve të kontrollojnë të dhënat e votuesve dhe të verifikojnë shtetësinë e tyre.
Vendimi i Gjykatës Supreme u mor me votën 6-3. Tre gjyqtaret me prirje liberale, Sonia Sotomayor, Elena Kagan dhe Ketanji Brown Jackson, votuan kundër.
Administrata Trump e zgjeroi përdorimin e sistemit SAVE vitin e kaluar, duke e lidhur atë me të dhëna shtesë, përfshirë informacion nga regjistrat e Sigurimeve Shoqërore, dhe duke lejuar kërkime në masë mbi listat e votuesve.
Gjykata Supreme arsyetoi se ligji federal i lejon Departamentit të Sigurisë Kombëtare të kërkojë të dhëna mbi shtetësinë dhe statusin e emigracionit nga agjenci të tjera federale.
Sipas shumicës së gjyqtarëve, qeveria federale ka gjithashtu detyrimin t’u përgjigjet kërkesave të shteteve për verifikimin e shtetësisë së votuesve.
Megjithatë, përdorimi i sistemit SAVE nga shtetet mbetet vullnetar.
Në qershor, një gjykatë federale bllokoi përdorimin e versionit të zgjeruar të SAVE, duke argumentuar se sistemi mund të shkelte ligjet federale për privatësinë dhe të çonte në identifikimin e gabuar të shtetasve amerikanë si persona që nuk kanë shtetësi.
Një gjykatë federale apeli la në fuqi këtë vendim, përpara se Gjykata Supreme ta pezullonte atë më 25 shtator.
Kritikët e sistemit kanë vënë në pikëpyetje saktësinë e të dhënave dhe kanë paralajmëruar se përdorimi i tyre mund të çojë në heqjen e gabuar të votuesve të ligjshëm nga listat zgjedhore.
Në Travis County, Teksas, autoritetet shqyrtuan dhjetëra votues të identifikuar nga sistemi si persona që mund të mos ishin shtetas amerikanë. Një pjesë e tyre rezultuan më pas se ishin shtetas amerikanë.
Rasti ka shtuar shqetësimet mbi mundësinë që gabimet në bazat federale të të dhënave të prekin veçanërisht shtetasit e natyralizuar.
Gjyqtarja Ketanji Brown Jackson, e cila kundërshtoi vendimin së bashku me dy koleget e saj, shprehu shqetësimin se përdorimi i sistemit mund të çojë në heqjen e gabuar të të drejtës së votës për persona që plotësojnë kushtet ligjore.
Ajo argumentoi se dëmi që mund t’u shkaktohet edhe disa votuesve të ligjshëm është më i madh se dëmi që pëson qeveria kur pengohet të ndërmarrë një veprim për të cilin mund të mos ketë autoritet ligjor.
Pavarësisht vendimit të Gjykatës Supreme, ndikimi i menjëhershëm në zgjedhjet e mesmandatit pritet të jetë i kufizuar.
Ligji federal ndalon pastrimet e gjera të listave të votuesve brenda 90 ditëve para një zgjedhjeje. Për këtë arsye, vendimi i Gjykatës Supreme u lejon shteteve të kryejnë verifikime, por nuk u jep automatikisht mundësinë të bëjnë pastrime masive të listave zgjedhore në prag të zgjedhjeve.
Programi SAVE ekziston që prej vitit 1986 dhe fillimisht u krijua për të ndihmuar autoritetet të verifikonin statusin e emigracionit të personave që aplikonin për përfitime publike.
Administrata Trump e ka zgjeruar përdorimin e tij për verifikimin e listave të votuesve, ndërsa debati ligjor mbi mënyrën se si përdoret sistemi pritet të vazhdojë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
