Japonia në panik, mbyllen më shumë se 100 shkolla për shkak të një epidemie të re

Autoritetet shëndetësore japoneze kanë konfirmuar një epidemi në rritje, me mijëra njerëz të infektuar me virusin e frymëmarrjes dhe një numër të pazakontë infeksionesh për këtë periudhë të vitit, 6013 raste të raportuara deri më 10 tetor. 

Sipas një raporti online në Nature, shpërthimet e gripit zakonisht në Japoni ndodhin në fund të nëntorit, por sot numri i rasteve është në nivel epidemie dhe më shumë se 100 shkolla janë mbyllur.

Pothuajse gjysma e 287 personave të shtruar në spital prej gripit në shtator ishin fëmijë të moshës 14 vjeç ose më të vegjël.

Shpërthimet mund të shkaktohen nga një lloj i gripit A, i quajtur H3N2, i cili është përhapur në Australi dhe Zelandën e Re gjatë dy muajve të fundit, duke përkuar me fundin e dimrit në Hemisferën Jugore. 

Këtë vit, rritja e numrit të njerëzve të trajtuar për grip filloi pesë javë më herët se zakonisht, thotë Vinod Balasubramaniam, një virolog molekular në Universitetin Monash të Malajzisë në Subang Jaya.

Japonia ka pasur një fillim më të hershëm të sezonit të gripit vitet e fundit, por kurrë kaq herët, thotë Ian Barr, zëvendësdrejtor i Qendrës Bashkëpunuese për Kërkimin dhe Referencën e Gripit të Organizatës Botërore të Shëndetësisë në Melburn. 

Normalisht, rastet mund të shfaqen në tetor, por jo shifrat epidemike, shton ai.

Rritja e udhëtimeve ndërkombëtare është ndoshta një faktor që ndikon në fillimin e hershëm të sezonit të gripit, por të njëjtën gjë bëjnë edhe ndryshimet klimatike dhe ekspozimi i ulët ndaj virusit që qarkullon, veçanërisht tek të moshuarit dhe fëmijët. 

Vende të tjera, përfshirë Malajzinë, kanë përjetuar gjithashtu sezone të hershme të gripit këtë vit, të dominuara nga lloji H3N2.

Rreth 6000 nxënës në Malajzi janë infektuar dhe disa shkolla janë mbyllur. Australia dhe Zelanda e Re kanë parë gjithashtu rritje të hershme të rasteve të gripit, me lloje të ndryshme që dominojnë shpërthimet, vazhdon Barr.