Katër civilë u vranë dhe katër të tjerë u plagosën në Afganistan në një shkëmbim zjarri në një zonë kufitare me Pakistanin, tha për AFP guvernatori i provincës Spin Boldak të Afganistanit, Abdul Karim Jahad.
Autoritetet talebane në Afganistan dhe qeveria pakistaneze akuzuan njëra-tjetrën të premten për hapjen e zjarrit në një zonë kufitare.
Zyrtarë nga të dyja palët thanë se përleshjet shpërthyen të premten në mbrëmje, ku të dy vendet akuzuan njëra-tjetrën se hapën zjarr të parët.
Në një postim në X, zëdhënësi i qeverisë talebane të Afganistanit, Zabihullah Mujahid, tha se forcat pakistaneze kishin nisur sulme drejt distriktit Spin Boldak, duke bërë që forcat afgane të kundërpërgjigjeshin.
Një zëdhënës i kryeministrit pakistanez Shehbaz Sharif tha se ishin forcat afgane ato që kryen “të shtëna të paprovokuara” përgjatë kufirit Chaman.
“Pakistani mbetet plotësisht vigjilent dhe i përkushtuar për të siguruar integritetin e tij territorial dhe sigurinë e qytetarëve tanë”, tha zëdhënësi Mosharraf Zaidi në një deklaratë.
Marrëdhëniet janë përkeqësuar midis Afganistanit dhe Pakistanit që kur talebanët u rikthyen në pushtet në vitin 2021, kryesisht për shkak të akuzave të Islamabadit se Kabuli po u ofron strehim disa grupeve të armatosura, përfshirë talebanët e Pakistanit (TTP).
TTP-ja ka zhvilluar fushatë të vazhdueshme kundër shtetit pakistanez që nga viti 2007 dhe shpesh përshkruhet si binjaku ideologjik i talebanëve afganë.
Të mërkurën, një shpërthim bombe në anë të rrugës në Pakistan pranë kufirit afgan, të cilin e mori përsipër TTP-ja, vrau tre oficerë policie pakistaneze.
Pakistani akuzon gjithashtu Afganistanin për strehimin e Ushtrisë Çlirimtare të Balochistanit dhe një dege lokale të ISIS-it të njohur si ISKP, edhe pse ISKP është një armik i betuar i talebanëve afganë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
