Autoritetet polake kanë arrestuar një arkeolog të njohur rus nga Muzeu i famshëm Hermitage në Shën Petersburg, i cili kërkohet nga Ukraina për gërmime të paligjshme dhe shkatërrim të pjesshëm të një siti arkeologjik në Krime.
Sipas prokurorëve ukrainas, i dyshuari, i identifikuar nga autoritetet polake si Aleksandr B, ka kryer gërmime të paligjshme në qytetin e lashtë Myrmekion në Kerch nga viti 2014 deri në vitin 2025. Prokuroria e akuzon atë se ka shkaktuar dëme që arrijnë në 201.6 milionë hryvnia (rreth 4.77 milionë dollarë).
Arkeologu është shef i Arkeologjisë së Lashtë të Detit të Zi Verior në muzeun Hermitage. Ai u arrestua më 4 dhjetor në Poloni dhe, gjatë marrjes në pyetje në Varshavë, ka refuzuar të japë shpjegime, ka bërë të ditur Prokuroria e Distriktit të Varshavës.
Ministria e Jashtme e Rusisë e identifikoi të arrestuarin si Alexander Butyagin dhe e cilësoi ndalimin si “tiraní ligjore”. Kremlini theksoi se do të kërkojë përmes kanaleve diplomatike mbrojtjen e shtetasit të vet.
Myrmekion është një koloni e lashtë greke e shekullit VI p.e.s., e vendosur në Krimenë e sotme, e cila u pushtua dhe u aneksua nga Rusia në vitin 2014.
BBC raporton se Ukraina ka paraqitur zyrtarisht kërkesë për ekstradimin e arkeologut në nëntor. Gjykata e Varshavës ka vendosur ta mbajë atë në paraburgim për 40 ditë, deri më 13 janar, në qendrën e ndalimit Warsaw-Białołęka, ndërsa procesi i ekstradimit është në zhvillim.
Autoritetet polake konfirmuan se ambasada ruse në Varshavë është njoftuar dhe po i ofron arkeologut asistencë konsullore. Rusia thotë se Butyagin ndodhej në Poloni për të mbajtur ligjërata shkencore mbi Pompein dhe qytete të tjera antike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
