Ekspertët britanikë të ushqimit dhe sigurisë kanë paralajmëruar se Britania e Madhe po “ecën në gjumë drejt një krize ushqimore”, ndërsa moti ekstrem, inflacioni dhe tensionet gjeopolitike po kërcënojnë furnizimin me ushqime dhe rritjen e çmimeve.
Sipas specialistëve, vala e të nxehtit që ka goditur vendin pas një pranvere të thatë po dëmton rëndë prodhimin bujqësor dhe blegtorinë.
Temperaturat e larta pritet të reduktojnë rendimentin e kulturave, ndërsa fermerët po përballen me humbje ekonomike që mund të arrijnë qindra miliona paund.
Ekspertët paralajmërojnë se çmimet e ushqimeve mund të rriten ndjeshëm gjatë muajve të ardhshëm, ndërsa lufta në Iran dhe tensionet në ngushticën e Hormuzit po mbajnë të larta kostot e karburantit dhe plehrave kimike.
Kjo situatë po shton frikën për presione të reja inflacioniste dhe përçarje në zinxhirët globalë të furnizimit.
Një grup ekspertësh, përfshirë ish-drejtues të industrisë ushqimore dhe akademikë, i kanë kërkuar qeverisë britanike të përditësojë strategjinë kombëtare të ushqimit për t’u përgatitur ndaj një klime më të ashpër dhe krizave të ardhshme.
Ata kërkojnë më shumë mbështetje për prodhimin vendas, forcim të zinxhirëve të furnizimit dhe garantimin e aksesit në ushqime të përballueshme për qytetarët.
Edhe Komiteti i Ndryshimeve Klimatike ka paralajmëruar se dëmet nga ndryshimet klimatike në prodhimin ushqimor mund të kalojnë 2 miliardë paund në vit gjatë dekadës së ardhshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
