Çmimi i naftës në tregjet ndërkombëtare ka rënë në nivelet më të ulëta që nga periudha para përshkallëzimit të konfliktit mes SHBA-së, Izraelit dhe Iranit, teksa trafiku detar në Ngushticën strategjike të Hormuzit po i rikthehet gradualisht normalitetit.
Nafta Brent, referenca globale e tregut, ra përkohësisht nën 72.48 dollarë për fuçi, niveli i regjistruar një ditë para sulmeve të SHBA-së dhe Izraelit ndaj Iranit, përpara se të stabilizohej në rreth 72.63 dollarë.
Tregjet energjetike kanë përjetuar luhatje të forta javët e fundit, pasi Irani reagoi ndaj sulmeve duke kufizuar kalimin në Ngushticën e Hormuzit, një nga rrugët më të rëndësishme në botë për transportin e naftës dhe gazit. Rënia e çmimeve është përshpejtuar pas nënshkrimit më 17 qershor të një Memorandumi Mirëkuptimi (MOU) mes SHBA-së dhe Iranit, i cili parashikon një periudhë 60-ditore negociatash për programin bërthamor iranian dhe masa të tjera që synojnë përfundimin e konfliktit. Përfaqësues të të dy vendeve u takuan fundjavën e kaluar në Zvicër, ku zhvilluan bisedime për t'i dhënë fund luftës. Si rezultat, SHBA-ja ka lehtësuar pjesërisht sanksionet ndaj eksporteve iraniane të naftës. Sipas kompanisë së inteligjencës detare Kpler, numri i anijeve që kalojnë përmes Ngushticës së Hormuzit është rritur ndjeshëm pas arritjes së marrëveshjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
