Autoritetet spanjolle njoftuan se kalimet e emigrantëve drejt enklavës së Ceutës u ndalën gjatë natës, ndërsa të shtunën nisi instalimi i një barriere lundruese 500 metra pranë kufirit me Marokun.
Masa u ndërmor pas një vale të madhe kalimesh, e cila, sipas raportimeve, shkaktoi vdekjen e të paktën 67 personave.
Sipas qeverisë spanjolle, rreth 50 mijë persona hynë në Ceuta nga toka dhe deti që prej së enjtes, duke shënuar një nga flukset më të mëdha të regjistruara ndonjëherë në këtë kufi të Bashkimit Europian me Afrikën. Mbi 48 mijë prej tyre u kthyen në Marok brenda 48 orëve.
Punimet për vendosjen e barrierës nisën në orën 07:50 të mëngjesit në zonën e valëpritësit Tarajal, një prej pikave më të përdorura nga emigrantët për të hyrë në territorin spanjoll.
Sipas autoriteteve, barriera pneumatike do të ngrihet 30 deri në 70 centimetra mbi sipërfaqen e ujit dhe do të shtrihet deri në një metër nën të. Gjithashtu, një korridor i posaçëm do t’u mundësojë anijeve të Gardës Civile të patrullojnë zonën.
Ngjarja ka ngritur shqetësime në Bashkimin Evropian. Një grup prej 22 shtetesh anëtare i ka dërguar një letër institucioneve evropiane, duke kërkuar koordinim më të madh për mbrojtjen e kufijve të jashtëm dhe masa shtesë për menaxhimin e situatës.
Irlanda, e cila mban presidencën e radhës të Këshillit të Europës, njoftoi se ka thirrur një mbledhje urgjente me ministrat e Brendshëm të vendeve anëtare, e planifikuar të zhvillohet me videokonferencë të martën.
Ndërkohë, kryeministri spanjoll Pedro Sanchez kritikoi vendimin e Italisë për të pezulluar për një muaj zbatimin e marrëveshjes Schengen me Spanjën.
Në një letër drejtuar Komisionit Evropian dhe presidentëve të Këshillit Evropian, ai e cilësoi këtë vendim si një reagim egoist, përçarës dhe në kundërshtim me parimet e bashkëpunimit evropian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
