Kupa e Botës, Trump dhe Sanchez shtrënguan duart për herë të parë publikisht pas një viti tensionesh

Finalja e së dielës e Kupës së Botës 2026 u ndoq nga zyrtarë të lartë ndërkombëtarë, nga një ambient me xham antiplumb në stadium, me masa të rrepta sigurie.

Pas xhamit e gjetën veten Presidenti amerikan Donald Trump, për herë të parë pranë kryeministrit spanjoll Pedro Sanchez, me të cilin ka një marrëdhënie të vështirë. 

Presidenti amerikan përshëndeti zyrtarisht Sanchez dhe shtrëngoi dorën me të, me të cilin është përplasur vazhdimisht për shkak të refuzimit të Spanjës për të rritur shpenzimet e mbrojtjes në 5% të PBB-së, siç u ra dakord në samitin e NATO-s një vit më parë.

Sanchez e kishte bërë të qartë në atë kohë se Madridi nuk do ta miratonte këtë qëllim, duke argumentuar se Spanja mund të përmbushte detyrimet operacionale të Aleancës me kosto më të ulëta.

Marrëdhëniet midis dy palëve u përkeqësuan më tej kur qeveria spanjolle refuzoi të autorizonte përdorimin e bazave të përbashkëta ushtarake SHBA-Spanjë nga avionët amerikanë që merrnin pjesë në operacione kundër Iranit.

Trump e kishte përshkruar vazhdimisht Spanjën si një “aleat tmerrësisht të keq” , duke e shoqëruar deklaratën e tij me një sërë komentesh mjaft të ashpra.

Megjithatë, në javët e fundit, tensionet janë zbutur. Madridi u zotua të rrisë shpenzimet e mbrojtjes dhe të marrë pjesë në një mision të përbashkët në Finlandë, gjë që ndihmoi në qetësimin e përkohshëm të konfliktit. Kështu, për 90 minutat e finales, dallimet politike u lanë mënjanë.

Shtrëngimi publik i duarve i të dy udhëheqësve ishte treguesi i dytë i këtij afrimi të pasigurt, pas takimit të tyre të shkurtër dypalësh në samitin e Ankarasë në fillim të këtij muaji, kur ata diskutuan megjithëse shkurtimisht, për futbollin dhe golfin.

Disa orë para takimit, Sanchez shfrytëzoi një intervistë me transmetuesin publik spanjoll RTVE për të uruar Trumpin me rastin e 250-vjetorit të themelimit të Shteteve të Bashkuara.