Presidenti i SHBA-ve, Donald Trump, ka shparndarë një video në rrjetet sociale ku bëhet thirrje për një ligj që do t’i bënte mediat, krijuesit e përmbajtjes dhe rrjetet e mediave sociale financiarisht përgjegjëse nëse bëjnë pretendime të rreme apo akuza të pabazuara ndaj kujdo.
Presidenti ripostoi një klip të shkurtër në Truth Social që u publikua fillimisht në TikTok nga një grua me emrin Elly May. Atje, ajo i bën thirrje atij dhe administratës së tij të rivendosin Aktin Smith-Mundt, i cili, sipas saj, "i mbante korporatat e lajmeve përgjegjëse për gënjeshtrën ndaj popullit amerikan dhe përhapjen e propagandës në vend të së vërtetës".
Pjesë e legjislacionit të epokës së Luftës së Ftohtë, Akti Smith-Mundt kishte për qëllim parandalimin e përhapjes së përmbajtjes mediatike amerikane të destinuar për audienca të huaja, siç është ajo nga Zëri i Amerikës ose Radio Liria.
Në video, May i kërkoi gjithashtu Trump ta quante atë "Akti Charlie Kirk" pas vrasjes së aktivistit konservator këtë javë. Ajo akuzoi median se po sjell "kaos, urrejtje, përçarje dhe anarki në të gjithë vendin" dhe gjithashtu e lidhi vdekjen e Kirkut me "retorikën e vazhdueshme të urrejtjes" me të cilën ai u përball në internet dhe në media.
Trump nuk komentoi videon e May në ripostimin e tij. Një peticion i nisur në Change.org të shtunën mori gati 43,000 nënshkrime brenda rreth një dite. I drejtuar Trump dhe zëvendëspresidentit JD Vance, ai gjithashtu u bëri thirrje atyre të vendosin dënime të rrepta kundër mediave të lajmeve, krijuesve të përmbajtjes dhe rrjeteve sociale për përhapjen e "narrativave të rreme", akuzave të pabaza ose përdorimit të censurës "të padrejtë" .
31-vjeçari Kirk, themeluesi i "Turning Point USA", u vra ndërsa po mbante një fjalim para studentëve në një kolegj në Orem, Utah, të mërkurën. Një i dyshuar i arrestuar në lidhje me rastin thuhej se ishte “thellësisht i indoktrinuar me ideologji të majtë”, sipas Guvernatorit të Utah-ut, Spencer Cox. Pas incidentit, Trump u zotua të ndiqte jo vetëm vrasësin e Kirk, por edhe atë që ai e quajti rrjet të “së majtës radikale” që nxisin dhunën politike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
