Më 3 tetor 1990, landet që përbënin ish-Gjermaninë Lindore u bashkuan zyrtarisht me Republikën Federale të Gjermanisë, emri zyrtar i Gjermanisë Perëndimore, duke i dhënë fund ndarjes së gjatë të vendit pas Luftës së Dytë Botërore.
Kjo datë shënon Ditën e Unitetit Gjerman, një festë kombëtare që përkujton ribashkimin e vendit pas dekadash të ndarjes së imponuar gjatë Luftës së Ftohtë.
Në përvjetorin e 35-të të këtij momenti historik, Gjermania do të mirëpresë presidentin francez Emmanuel Macron, i cili do të mbajë një fjalim në Saarland, një land perëndimor gjerman.
Ngjarja do të mbahet në Sallën e Kongreseve në Saarbrücken, ku pritet të marrin pjesë rreth 900 të ftuar nga fusha të ndryshme të jetës publike, përfshirë politikën, biznesin, fenë dhe shoqërinë civile. Edhe kancelari gjerman, Friedrich Merz, do të jetë i pranishëm.
Megjithatë, edhe pse ka kaluar më shumë se një gjysmë shekulli nga ndarja dhe tri dekada nga ribashkimi, sfidat e këtij procesi vazhdojnë të ndihen.
Një sondazh i fundit i porositur nga transmetuesi ZDF tregon se 90% e qytetarëve nga ish-Gjermania Lindore dhe 92% nga ish-Gjermania Perëndimore besojnë se ribashkimi ishte vendimi i duhur.
Por sfidat mbeten: 57% e të anketuarve nga lindja dhe 47% nga perëndimi mendojnë se problemet që lidhen me ribashkimin janë ende të pazgjidhura. Sondazhi nxjerr në pah edhe diferenca të theksuara në mënyrën se si qytetarët nga dy pjesët e dikurshme e kanë përjetuar procesin e ribashkimit.
Pas rënies së Murit të Berlinit në nëntor të vitit 1989, procesi i bashkimit u konkretizua brenda më pak se një viti, duke i dhënë fund ndarjes më shumë se katërdekadëshe të një kombi që, megjithë bashkimin politik, ende po përpiqet të arrijë një unitet të plotë në të gjitha nivelet e jetës shoqërore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
