Protestë kundër emigrantëve në Holandë, i vihet flaka një qendre për azilkërkuesit

Në një protestë të mbajtur në Loosdrecht, protestuesit holandezë i vunë flakën një qendre strehimi për emigrantët. 

Protesta është e fundit në një valë demonstratash kundër mbërritjes së azilkërkuesve.

Sipas NOS, një turmë e zemëruar hodhi fishekzjarre në një ndërtesë të bashkisë që autoritetet thanë se do të strehonte përkohësisht refugjatët. Incidenti ndodhi pasi grupi i parë prej 15 azilkërkuesish mbërriti më herët atë ditë.

Turma hodhi objekte drejt oficerëve të policisë dhe u përpoq të bllokonte hyrjen e zjarrfikësve në vend. Zjarri u shua përfundimisht dhe disa persona u arrestuan, raportoi NOS.

Protestat e mëparshme në Loosdrecht, një qytet me 8 600 banorë, i kanë detyruar autoritetet të zvogëlojnë planet për të strehuar 110 azilkërkues në 70.

Muajin e kaluar, një peticion që kundërshtonte hapjen e qendrës, i nënshkruar nga 3000 persona, iu dorëzua autoriteteve. Pavarësisht protestave nga banorët vendas dhe pronarët e bizneseve, një gjykatë vendosi që ndërtesa e zbrazur e bashkisë të përdorej për të strehuar refugjatët.

Disa politikanë të krahut të djathtë iu bashkuan tubimeve. Gidi Markuszoëer, lider i Aleancës Holandeze (ADN), i tha turmës se refugjatët duhet të “kthehen në vendin e tyre”.