Përshkallëzimi i konfliktit në Lindjen e Mesme po rrezikon seriozisht ekonominë globale, teksa mbyllja efektive e Ngushticës së Hormuzit ka ndërprerë rrjedhën e një pjese të madhe të eksporteve të naftës dhe gazit natyror.
Irani ka kërcënuar sulme ndaj anijeve që kalojnë në këtë korridor jetik, nga ku transiton rreth një e pesta e prodhimit global të energjisë çdo ditë, si dhe ka goditur infrastrukturën energjetike në rajon.
Pasojat janë ndjerë menjëherë në tregje: çmimet e karburanteve në SHBA shënuan rritjen më të madhe ditore që nga viti 2005, ndërsa bursat aziatike pësuan rënie të forta. Vendet që varen nga furnizimet e Gjirit po përballen me masa emergjente.
Në Mianmar është vendosur sistem racionimi i karburantit, ndërsa në Tajlandë autoritetet kanë bërë thirrje kundër grumbullimit të karburantit dhe kanë nxitur punën nga shtëpia.
Presidenti amerikan Donald Trump ka deklaruar se marina amerikane do të shoqërojë tankerat nëpër Gjirin Persik “nëse është e nevojshme”, në përpjekje për të qetësuar tregjet.
Ekspertët paralajmërojnë se nëse konflikti zgjatet, inflacioni global mund të rritet ndjeshëm dhe rritja ekonomike të ngadalësohet.
Ndërkohë, OKB-ja paralajmëron për rrezik të krizës humanitare, me rritje të çmimeve të ushqimeve dhe mungesë furnizimesh bazë në vendet që varen nga importet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
