Gazeta prestigjioze The New York Times është paditur nga një agjenci federale amerikane, e cila pretendon se politikat e saj për diversitet kanë çuar në diskriminim ndaj një punonjësi të bardhë mashkull.
Padia është ngritur nga US Equal Employment Opportunity Commission (EEOC) në një gjykatë federale në Manhattan dhe lidhet me një vendim punësimi për postin e zëvendësredaktorit të sektorit të pasurive të paluajtshme në vitin 2025. Sipas akuzave, gazeta ka shkelur ligjin federal duke anashkaluar një kandidat për shkak të racës dhe gjinisë së tij.
Në dokumentet e paraqitura, thuhet se redaktori i lartë, i cili kishte punuar në gazetë që prej vitit 2014, ishte më i kualifikuar për pozicionin, por nuk u përfshi në fazën finale të intervistave.
EEOC argumenton se vendimi u ndikua nga objektivat e deklaruara publikisht për diversitet të gazetës, përfshirë një iniciativë të vitit 2021 për të rritur numrin e grave dhe personave me ngjyrë në pozita drejtuese. Sipas agjencisë, asnjë nga kandidatët që arritën në fazën finale nuk ishte mashkull i bardhë.
Kryetarja e EEOC, Andrea Lucas, theksoi se ligji federal “nuk lejon vendime punësimi bazuar në racë apo gjini”, duke shtuar se nuk ekziston “asnjë përjashtim për diversitet” ndaj rregullave kundër diskriminimit.
Nga ana tjetër, The New York Times i ka hedhur poshtë akuzat, duke e cilësuar çështjen si të motivuar politikisht. Zëdhënësja e kompanisë, Danielle Rhoades Ha, deklaroi se praktikat e punësimit bazohen në meritë dhe se “as raca dhe as gjinia nuk kanë luajtur rol” në këtë vendim.
Ky rast vjen në një klimë më të gjerë debatesh në SHBA rreth politikave të diversitetit, barazisë dhe përfshirjes (DEI), të cilat janë kundërshtuar nga presidenti Donald Trump. Ai ka argumentuar se programe të tilla diskriminojnë punonjësit e bardhë dhe nxisin paragjykime ideologjike.
Që nga rikthimi në detyrë në vitin 2025, Trump ka nënshkruar disa urdhra ekzekutivë për të kufizuar iniciativat DEI në administratën federale dhe sektorë të rregulluar. Ndërkohë, kompani të mëdha si Walmart dhe Google kanë reduktuar ose hequr angazhimet e tyre për DEI nga politikat dhe materialet publike.
Në shtator, Trump ngriti gjithashtu një padi prej 15 miliardë dollarësh për shpifje ndaj The New York Times, duke e akuzuar gazetën për një fushatë denigruese dhe për favorizim të demokratëve në raportimet e saj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
