Kompania amerikane e inteligjencës artificiale Anthropic ka bërë të disponueshëm për publikun Claude Fable 5, një version i modelit të saj të avancuar të AI-së, i cili deri tani ishte i kufizuar vetëm për testime dhe përdorim nga organizata të përzgjedhura.
Claude Fable 5 bazohet në modelin Claude Mythos, i prezantuar në muajin prill, i cili ngjalli debat të gjerë mes drejtuesve të teknologjisë, financave dhe institucioneve qeveritare për shkak të aftësive të tij të avancuara.
Disa zyrtarë dhe ekspertë shprehën shqetësime se sistemi ishte aq i fuqishëm sa mund të paraqiste rreziqe për sigurinë financiare dhe kibernetike, ndërsa të tjerë vunë në dyshim nëse vlerësimet për të ishin reale apo pjesë e strategjive të marketingut.
Në njoftimin e saj të së martës, Anthropic tha se Claude Fable 5 do të publikohet me masa mbrojtëse dhe kufizime për përdoruesit, por pranoi se “publikimi i një modeli me këto aftësi shoqërohet me rreziqe”.
“Kapacitetet e Fable tejkalojnë ato të çdo modeli që kemi vënë ndonjëherë në dispozicion të publikut”, deklaroi kompania.
Kur Claude Mythos u prezantua fillimisht për një grup të kufizuar organizatash, Anthropic argumentoi se modeli ishte aq i avancuar sa mund të përdorej për të shfrytëzuar dobësi apo për të depërtuar në sisteme kompjuterike, ndaj kërkonte testime të kujdesshme përpara çdo publikimi më të gjerë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
