Teatro La Fenice, një nga institucionet më prestigjioze të operës në Evropë, ka ndërprerë bashkëpunimin me dirigjenten dhe pianisten Beatrice Venezi pas një periudhe të gjatë tensioni dhe protestash.
Vendimi u bë publik nga Fondacioni La Fenice, i cili deklaroi se deklaratat e përsëritura publike të Venezit ishin “fyese dhe të dëmshme” për reputacionin artistik dhe profesional të teatrit dhe orkestrës së tij. Konflikti u përshkallëzua pasi dirigjentja kritikoi hapur strukturën e punësimit në institucion, duke e cilësuar atë si nepotike dhe të mbyllur ndaj ndryshimeve.
Venezi kishte theksuar në intervista se mungesa e “kumbarëve” politikë dhe prejardhjes muzikore e bënte një figurë të pazakontë në këtë ambient, duke shtuar se pozicionet në orkestër shpesh kalonin “nga babai te djali”. Ajo gjithashtu kritikoi mungesën e përpjekjeve për të tërhequr audienca më të reja.
Emërimi i saj kishte hasur kundërshtime të forta që në fillim nga muzikantët dhe stafi, të cilët vinin në dyshim përvojën e saj dhe lidhjet e supozuara me qeverinë italiane të udhëhequr nga Giorgia Meloni. Protestat përfshinë edhe publikun, i cili shprehu pakënaqësi gjatë shfaqjeve.
Ndërkohë, autoritetet italiane kanë mohuar çdo ndikim politik në vendim, duke theksuar se shkarkimi është marrë në mënyrë të pavarur nga drejtuesit e teatrit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
