Demokratët e Komisionit të Mbikëqyrjes në Dhomën e Përfaqësuesve publikuan të premten një set të ri fotosh nga prona e Jeffrey Epstein, trafikantit të dënuar seksual.
Fotot tregojnë një sërë figurash të fuqishme dhe të njohura që dikur ndodheshin në orbitën e Epstein, përfshirë Presidentin Donald Trump, ish-presidentin Bill Clinton, Steve Bannon, Bill Gates, Richard Branson dhe personalitete të tjera të profilit të lartë. Shumë prej tyre ishin lidhur më parë me Epstein, por imazhet e reja pritet të shtojnë edhe më shumë interes mbi natyrën e marrëdhënieve të tyre.
Sipas komisionit, 19 imazhet e publikuara vijnë nga arkiva e pronës së Epstein dhe tregojnë se ai kishte lidhje të gjera me figura të njohura në ekonomi, politikë dhe kulturë. Këto materiale shihen si pjesë e një koleksioni shumë më të madh me mbi 95,000 foto.
Një nga fotot tregon Trump të rrethuar nga gjashtë gra, me fytyrat e tyre të redaktuara. Në imazhe të tjera shfaqen Bannon dhe Epstein duke bërë selfie përpara një pasqyre, Bill Clinton me Epstein, Ghislaine Maxwell dhe një çift tjetër; si dhe miliarderi Bill Gates me ish-Princin Andrew. Edhe Larry Summers dhe avokati Alan Dershowitz shfaqen në disa prej fotove.
Komisioni thekson se asnjë prej imazheve nuk tregon sjellje të paligjshme dhe nuk besohet të përfshijnë të mitur. Nuk dihet ende se kur dhe ku janë realizuar fotot.
I drejtuar nga republikanët, komisioni ka marrë materialet direkte nga prona e Epstein si pjesë e një hetimi të gjerë të vazhdueshëm. Deri tani janë publikuar dhjetëra mijëra dokumente, email-e dhe komunikime që kanë hapur pista të reja për lidhjet e Epstein me figura të fuqishme.
Avokatët e pronës thanë se fotot e dorëzuara janë bërë në çdo pronë të përdorur nga Epstein ndërmjet viteve 1990 dhe 2019, dhe se redaktimet janë minimale, të kufizuara në raste nudoje.
Përfaqësuesi Robert Garcia, demokrati kryesor në komision, deklaroi se koleksioni i fundit përfshin “mbi 95,000 foto, përfshirë imazhe të burrave të fuqishëm që kaluan kohë me Epstein, si dhe mijëra foto të grave dhe pronave të tij”.
“Ka ardhur koha t’i jepet fund kësaj fshehjeje dhe t’i sillet drejtësi viktimave,” tha Garcia. “Departamenti i Drejtësisë duhet t’i publikojë të gjitha dokumentet, TANI.”
Ndërkohë, një zëdhënës i komisionit, nga pala republikane, akuzoi demokratët se po “zgjedhin foto të veçanta dhe po aplikojnë redaktime të synuara për të krijuar një narrativë të rreme kundër Presidentit Trump”, duke theksuar se “asgjë nga dokumentet e marra nuk dëshmon shkelje nga ana e tij”.
Clinton nuk është akuzuar për shkelje, dhe stafi i tij ka thënë se ai ndërpreu kontaktet me Epstein përpara vitit 2019.
Gates ka thënë se pendon që ka takuar Epstein, duke e cilësuar këtë si “një gabim të madh”.
Trump ka mohuar çdo lidhje të paligjshme dhe ka deklaruar më herët se e ka dëbuar Epstein nga klubi i tij.
Dokumentet e fundit, përfshirë email-et e Epstein ku ai pretendon se Trump “kaloi orë” me akuzuesen Virginia Giuffre, janë cilësuar “mashtrim” nga Shtëpia e Bardhë.
Ndërkohë, figura të tjera të lidhura me Epstein janë përballur me pasoja publike, si Larry Summers, i cili ka dhënë dorëheqje nga pozicionet publike dhe ka shprehur “turp të thellë” për lidhjen e mëparshme me Epstein.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
