Trafiku detar në Ngushticën e Hormuzit vijon të jetë nën nivelet mesatare, ndërsa tensionet mes Shteteve të Bashkuara dhe Iranit për kontrollin e kësaj rruge strategjike mbeten të larta.
Sipas të dhënave të kompanisë së gjurmimit detar Kpler, të raportuara nga Reuters, të enjten në ngushticë kaluan nëntë anije mallrash, kundrejt pesë një ditë më parë. Megjithatë, shifra mbetet nën mesataren ditore të gushtit, prej rreth 12 anijesh.
Pesë prej anijeve hynin në Gjirin Persik, ndërsa katër të tjera lundronin drejt Gjirit të Omanit. Shumica përdorën korridorin iranian të transportit detar.
Ndërkohë, në Ngushticën Bab al-Mandeb u regjistruan 19 anije me transponderë aktivë, një nivel i ngjashëm me një ditë më parë.
Të dhënat nuk përfshijnë anijet që lundrojnë me transponderët e fikur. Ngushtica e Hormuzit mbetet një pikë kyçe për tregtinë globale të naftës, ndaj çdo kufizim i trafikut detar mund të ndikojë në furnizimet dhe çmimet ndërkombëtare të energjisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
