Departamenti Amerikan i Shtetit u ka bërë thirrje qytetarëve amerikanë të largohen menjëherë nga Lindja e Mesme, duke paralajmëruar për “rreziqe serioze të sigurisë” në rajon. Thirrja vjen në një moment tensioni të lartë, ndërsa përshkallëzimi i situatës ka sjellë paralizë të konsiderueshme të trafikut ajror.
Autoritetet amerikane këshillojnë qytetarët të përdorin “udhëtimet komerciale të disponueshme” për t’u larguar nga Bahreini, Egjipti, Irani, Iraku, Izraeli, Bregu Perëndimor dhe Gaza, Jordania, Kuvajti, Libani, Omani, Katari, Arabia Saudite, Siria, Emiratet e Bashkuara Arabe dhe Jemeni.
Megjithatë, mundësitë për largim janë tejet të kufizuara. Sipas të dhënave nga FlightAware.com, më shumë se 1,000 fluturime u anuluan deri të martën në mëngjes, duke iu shtuar mijëra anulimeve të tjera ndërkombëtare gjatë fundjavës dhe fillimit të javës.
Ambasadori i SHBA-së në Izrael, Mike Huckabee, deklaroi se amerikanët në Izrael kanë “mundësi shumë të kufizuara” për t’u larguar nga vendi. Ai theksoi se ambasada amerikane aktualisht “nuk është në gjendje të evakuojë apo të ndihmojë drejtpërdrejt” qytetarët amerikanë për t’u larguar.
Ndërkohë, trafiku ajror mbi disa vende të rajonit – përfshirë Emiratet e Bashkuara Arabe, Katarin, Kuvajtin, Izraelin, Bahreinin, Irakun dhe Jordaninë – rezulton pothuajse i pezulluar, sipas hartave të publikuara nga platforma e monitorimit të fluturimeve Flightradar24.
Disa fluturime u nisën vonë të hënën nga Emiratet e Bashkuara Arabe, por të paktën një avion që udhëtonte nga India drejt Dubait u detyrua të kthehej mbrapsht.
Edhe vende të tjera perëndimore, përfshirë Kanadanë, Mbretërinë e Bashkuar dhe Australinë, u kanë bërë thirrje qytetarëve të tyre të shmangin udhëtimet drejt rajonit, ndërsa situata mbetet e tensionuar dhe e paparashikueshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
