Luksemburgu përfshin të drejtën për abort në Kushtetutën e tij. Me miratimin përfundimtar të amendamentit nga Dhoma e Deputetëve, pas miratimit fillestar parlamentar në mars, Dukati i Madh bëhet shteti i dytë në botë, pas Francës, që përfshin zyrtarisht të drejtën për abort në kartën e tij themelore.
Projektligji kushtetues, i promovuar në vitin 2024 me iniciativën e Marc Baum të Partisë së Majtë (Dei Lenk), i cili e quajti atë një “ditë historike”, u miratua me një shumicë dërrmuese, pesëdhjetë e një vota pro, gjashtë kundër dhe dy abstenime, duke vendosur një precedent të rëndësishëm.
Laurent Zeimet, kreu i Partisë Popullore Kristiane Sociale (CSV), siç raportuan mediat e Luksemburgut, theksoi se deputetëve të partisë së tij u lejohej të votonin sipas ndërgjegjes së tyre, ndërsa Taina Bofferding, kreu i Partisë Punëtore Socialiste të Luksemburgut (LSAP), e përshkroi amendamentin si një mesazh të qartë për ligjvënësit dhe shoqërinë.
Fred Keup, kreu i Partisë Reformiste të Alternativës Demokratike (ADR), e hodhi poshtë reformën si “të padobishme” dhe bëri thirrje në vend të kësaj për politika më efektive familjare.
Sam Tanson i Partisë së Gjelbër (Dei Greng) e mirëpriti votimin, duke argumentuar se do të krijonte një garanci për brezat e ardhshëm.
Gerard Schockmel i Partisë Demokratike (DP), kundërshtoi me forcë amendamentin, e kritikoi atë si një burim premtimesh të rreme. Schockmel argumentoi se amendamenti nuk do të ofronte një garanci të vërtetë, pasi kushtet për abortin mund të ndryshoheshin ende përmes një ligji të thjeshtë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
