Zbatimi gradual i Sistemit të Ri të Hyrje/Daljes (EES) në Bashkimin Evropian po shkakton vonesa të konsiderueshme në aeroporte, me pasagjerë që raportojnë pritje deri në tre orë në kontrollet kufitare.
Sistemi, i cili u prezantua në tetor dhe synon të regjistrojë të dhëna biometrike për shtetasit nga vendet jo-anëtare të BE-së, po zbatohet aktualisht vetëm për 10 për qind të udhëtarëve. Megjithatë, edhe ky nivel ka mjaftuar për të krijuar probleme serioze operacionale.
Sipas një raporti të publikuar nga ACI Europe, koha e përpunimit në kufij është rritur deri në 70 për qind, ndërsa aeroporte në vende si Franca, Gjermania, Italia, Spanja dhe Greqia janë ndër më të prekura.
Euronews raporton se problemet lidhen kryesisht me ndërprerje teknike, mungesë të kioskeve funksionale dhe staf të pamjaftueshëm kufitar. Raporti gjithashtu kritikon mungesën e një sistemi efikas për para-regjistrim të udhëtarëve.
ACI Europe paralajmëron se zgjerimi i zbatimit të EES në 35 për qind të udhëtarëve nga janari 2026 mund të përkeqësojë situatën, duke shkaktuar bllokime serioze dhe rreziqe për sigurinë në aeroporte.
Organizata u bën thirrje institucioneve evropiane që të rishikojnë urgjentisht mënyrën e zbatimit të sistemit, në mënyrë që të shmanget kaosi në sezonet e ardhshme të udhëtimeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
