KE u kërkon zyrtarëve të saj të lartë të mbyllin një grup në Signal nga frika e hakerimit

Komisioni Evropian u ka thënë disa prej zyrtarëve të tij më të lartë të mbyllin një grup në Signal, të cilin e përdorin për të shkëmbyer informacione nga frika se ishte një objektiv hakerimi.

Shefat e departamenteve dhe zëvendësshefat ishin pjesë e grupit në aplikacionin e mesazheve të koduara, sipas tre zyrtarëve të Komisionit, të cilëve u referohet Politico. Embargoja vjen ndërsa BE-ja përballet me një sërë akuzash për spiunazh.  Javën e kaluar, Komisioni bëri të ditur se po hetonte një sulm kibernetik në faqet e tij të internetit.

"Operacionet kibernetike" po "rriten në cilësi dhe sasi", duke përfshirë si nga kriminelët e etur për të dhëna ashtu edhe nga qeveritë e huaja, tha Sven Herpig, studiues i sigurisë kibernetike dhe kërcënimeve në zhvillim në qendrën gjermane të mendimit Interface. "Politikanët dhe partitë politike kanë qenë gjithmonë në shënjestër" të spiunëve, shtoi ai.

Komisioni u bë i vetëdijshëm për bisedën në grup muajin e kaluar dhe u kërkoi anëtarëve të tij ta fshinin atë nga frika se mund të ishin në shënjestër të hakerëve, thanë dy nga zyrtarët. Nuk ka prova që ndonjë anëtar i grupit është përgjuar dhe urdhri për të ndaluar përdorimin e bisedës u lëshua për shkak të shqetësimeve në rritje për sigurinë në lidhje me aplikacionet e mesazheve në institucion, tha njëri prej zyrtarëve. Muajin e kaluar, një bisedë telefonike private midis një gazetari të POLITICO dhe një zyrtari të BE-së u përgjua dhe u publikua në internet.

"Signal është mjaft i sigurt, por nëse një sulmues zotëron telefonin tuaj, ai mund të ketë qasje në bisedat tuaja, duke përfshirë fotot dhe gjithçka tjetër që keni në të" tha Herpig. "Nëse doni të komunikoni si politikan, si parlamentar... nuk keni mundësi më të mira."

Përdoruesit e aplikacionit të mesazheve WhatsApp janë bërë gjithashtu shënjestër, megjithëse përpjekjet për hakim kanë qenë kohët e fundit më të zakonshme në Signal, thanë dy prej zyrtarëve.

Udhëzimet zyrtare të Komisionit për punonjësit e tij sugjerojnë që ata duhet të shmangin WhatsApp dhe në vend të kësaj të përdorin Signal, të cilin ekspertët e sigurisë kibernetike e konsiderojnë si më të sigurt.