Ministri i Jashtëm i Francës, Jean-Noël Barrot, deklaroi të hënën se Irani duhet të pranojë lëshime të mëdha dhe të ndërmarrë ndryshime rrënjësore për të dalë nga kriza aktuale. Në një intervistë për Fox News, ai theksoi se zgjidhja e vetme mbetet heqja dorë nga programi bërthamor, duke nënvizuar se shqetësimet ndërkombëtare shkojnë përtej këtij aspekti.
Barrot paralajmëroi se kapacitetet balistike të Iranit, si dhe mbështetja për grupet e armatosura në rajon, përbëjnë kërcënime serioze për sigurinë globale. Sipas tij, komuniteti ndërkombëtar nuk mund të përqendrohet vetëm te çështja bërthamore, por duhet të adresojë një gamë më të gjerë rreziqesh.
Deklaratat e tij vijnë në një moment kur në Nju Jork ka nisur konferenca njëmujore e Kombeve të Bashkuara për rishikimin e Traktatit të Mospërhapjes së Armëve Bërthamore (NPT). Barrot theksoi rëndësinë e forcimit të këtij traktati dhe bëri thirrje që vende si Irani dhe Koreja e Veriut të ndalin zhvillimin e programeve të tyre bërthamore.
Në lidhje me marrëdhëniet mes Francës dhe Shteteve të Bashkuara, ai pranoi se ka pasur mosmarrëveshje, por nënvizoi se ato janë kapërcyer gjithmonë përmes bashkëpunimit të vazhdueshëm mes dy aleatëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
