Këtë të enjte Azerbajxhani dërgoi produkte të naftës me anë të hekurudhës drejt Armenisë, duke shënuar eksportin e parë të tillë pas dekadash dhe një përparim të prekshëm në përpjekjet për normalizimin e marrëdhënieve mes dy vendeve.
Dërgesa e së enjtes përfshinte 22 vagonë cisternë hekurudhorë që transportonin 1.210 tonë benzinë AI-95, të prodhuar nga kompania shtetërore e naftës e Azerbajxhanit, “SOCAR”, të cilët u nisën për në Armeni përmes Gjeorgjisë, raportoi media ndërkombëtare me bazë në Baku, ‘AnwZ’.
Zyrtarë nga të dyja palët thanë se eksporti përfaqëson një hap të rëndësishëm përtej deklaratave politike dhe demonstron përfitimet praktike ekonomike të paqes.
Dërgesa e karburantit pason një marrëveshje të arritur më 28 nëntor në Gabala, në veriperëndim të Azerbajxhanit, ku zëvendëskryeministri azerbajxhanas Shahin Mustafayev u takua me homologun e tij armen, Mher Grigoryan.
Të dyja palët diskutuan masa për ndërtimin e besimit dhe rivendosjen e lidhjeve ekonomike të ndërprera nga dekada konflikti dhe kufij të mbyllur, duke mundësuar tregti të dobishme dhe duke kontribuar në sigurinë energjetike dhe stabilitetin ekonomik, sipas ‘AneëZ’.
Të dy qeveritë theksuan rëndësinë simbolike të rivendosjes së një lidhjeje hekurudhore, e pezulluar prej vitesh për shkak të armiqësive, si një themel për rikthimin e lidhshmërisë më të gjerë rajonale.
Armenia aktualisht importon më shumë se 60% të karburantit të saj nga Rusia, 230.000 tonë benzinë dhe 175.000 tonë naftë në vitin 2024, ndërsa pjesa tjetër vjen nga Irani, Rumania, Malta dhe Turqia.
Duke rihapur rrugët tregtare dhe duke vendosur lidhje të besueshme tregtare, marrëveshja mund të hapë rrugën për zgjerimin e tregtisë në të gjithë Kaukazin Jugor, duke lidhur Armeninë, Azerbajxhanin dhe shtetet fqinje përmes korridoreve të ringjallura të transportit dhe energjisë, thonë analistët.
AI-95 është një benzinë pa plumb e kategorisë ”Premium”, e njohur gjithashtu si “super” ose “regular”, në varësi të tregut.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
