Korpusi i Gardës Revolucionare të Iranit (IRGC) njoftoi se ka lëshuar raketa dhe dronë ndaj objektivave amerikane në rajon, si kundërpërgjigje ndaj sulmeve ajrore të SHBA-së ndaj Iranit. Sipas IRGC-së, objektivat përfshinin një bazë ushtarake amerikane në Jordani dhe Flotën e Pestë të SHBA-së në Bahrein.
Ushtria jordaneze bëri të ditur se ka kapur pesë raketa iraniane, ndërsa në Bahrein raportohen shpërthime pranë një baze amerikane. Sirenat e alarmit u dëgjuan edhe në Kuvajt, ku autoritetet njoftuan për interceptimin e “objektivave ajrore armiqësore”.
Më herët, ministri i Jashtëm iranian, Abbas Araghchi, paralajmëroi se asnjë sulm amerikan nuk do të mbetej pa përgjigje. Ndërkohë, pas goditjeve të SHBA-së, shpërthime u raportuan në disa zona strategjike iraniane pranë Ngushticës së Hormuzit, përfshirë ishullin Qeshm, Bandar Abbas, Sirik, Minab dhe Jask.
Sipas ushtrisë amerikane, sulmet kishin në shënjestër sistemet iraniane të mbrojtjes ajrore, radarët dhe qendrat e kontrollit ushtarak. Mediat shtetërore iraniane raportuan dëmtime në infrastrukturën e komunikimit dhe ndërprerje të furnizimit me ujë në disa zona.
Tensionet u përshkallëzuan pasi një helikopter amerikan Apache u rrëzua, ngjarje për të cilën zyrtarë amerikanë thanë se mund të ketë qenë rezultat i një sulmi me dron iranian.
Presidenti Donald Trump deklaroi se përgjigjja amerikane ishte “shumë e fortë dhe shumë e fuqishme”, ndërsa administrata amerikane këmbëngul se zhvillimet nuk do të pengojnë përpjekjet diplomatike për një marrëveshje me Iranin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
