Një tërmet me magnitudë 6.2 ballë ka goditur Indonezinë lindore më 3 korrik, sipas Shërbimit Gjeologjik të Shteteve të Bashkuara (USGS), pa raportime të menjëhershme për viktima apo dëme materiale.
Epiqendra e tërmetit është regjistruar rreth 58 kilometra në perëndim të Tobelos, në provincën Maluku të Veriut, në një thellësi prej 120 kilometrash. Lëkundjet u ndjenë në orën 11:31 të paradites sipas kohës lokale.
Dëshmitarë në zonë përshkruan momente paniku gjatë lëkundjeve. “Isha ulur duke pirë kafe kur papritur karrigia filloi të dridhej. U frikësova, pasi ende kam traumë nga tërmetet e mëparshme”, tha një banor i Ternates për AFP, qytet rreth 114 kilometra larg epiqendrës.
Autoritetet indoneziane të meteorologjisë, klimatologjisë dhe gjeofizikës konfirmuan se nuk ishte lëshuar paralajmërim për cunami.
Indonezia ndodhet në të ashtuquajturën “Unaza e Zjarrit” të Paqësorit, një zonë me aktivitet të lartë sizmik ku tërmetet janë të shpeshta.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
